OÉ-CUSSE, 15 jullu 2022 (TATOLI) –Autoridade Aduaneira (AA/Alfándega ) iha Rejiaun Administrativa Espesiál Oé-Cusse Ambeno (RAEOA), rekolla reseita ba kofre Estadu iha trimestre daruak ne’e hamutuk $48,110.75.
“Ita-nia reseita iha trimestre daruak ne’e menus kompara ho trimestre primeiru, la hatene dezenvolvimentu maka laiha ka osan mak laiha, tanba reseita agora ne’e fulan-abríl, maiu to’o juñu hetan de’it rihun $48,110.75 kompara ho trimestre primeiru janeiru to’o marsu $60,912.55, entaun totál hamutuk trimestre primeiru no daruak hamutuk $94,752.25,” diretór Alfandega RAEOA, José da Costa, informa ba Agência Tatoli iha Oé-Cusse, sesta ne’e.
Fonte reseita ne’e rekolla liuhosi sasán importasaun maioria nesesidade bázika inklui sasán loza nian hanesan konstrusaun sivíl, ba transporte iha ema balu hatama de’it karreta ida rua hanesan ne’e, la’ós hanesan tinan hirak ba kotuk, tán ne’e mak afeta tebes ba reseita aduaneira nian.
“Taxa ne’e la inklui portu no aeroportu só importasaun de’it liuhosi fronteira terrestre hosi fronteira Sakato tanba hetan akompaña hosi parte saúde ba dezinfetn, ba Oésilo Pássabe no Nítibe desde COVID-19 la ativa tanba kondisaun dalan,” nia katak.
Nia fó-sai katak, fonte taxa ne’e kobre maioria importasaun nesesidade bázika no kontrusaun sivíl, tama kada semana, foin mak iha abríl to’o maiu maka Estadu autoriza importasaun tama kala loron, nune’e nia espera taxa Alfándega to’o dezembru tinan ne’e sei aumenta, tanba importasaun tama kada loron.
“Ita fiar katak, to’o dezembru taxa sei sa’e maka’as, iha-ne’e só tabaku laiha autorizasaun, kuandu hahán no nesesidade báziku seluk bele, no sasán eletrónika, inklui konstrusaun nian,” nia afirma.
Totál funsionáriu ne’ebé servisu iha Autoridade Aduaneiru RAEOA hamutuk ema na’in-43, na’in-sia (9) permanente no kontratadu na’in-34.
Jornalista : Abílio Elo Nini
Editór : Evaristo Soares Martins
