CI sujere Autoridade RAEOA integra mídia iha planu dezenvolvimentu
OÉ-CUSSE, 15 jullu 2022 (TATOLI) – Prezidente Konsellu Imprensa (CI, sigla portugés), Virgílio Guteres, husu Autoridade Rejiaun Administrativa Espesiál Oé-Cusse Ambeno (RAEOA) atu garante investimentu maka’as iha setór mídia hodi integra iha planu dezenvolvimentu iha rejiaun ne’e.
“Konsellu Imprensa kontinua halo advokasia iha nível nasionál, liuliu ba Estadu no Governu, atu tau atensaun ba alokasaun bele garante investimentu maka’as iha setór mídia tanba agora iha RAEOA, ami ko’alia ona ho Prezidente autoridade ba planu dezenvolvimentu RAEOA nian tenke integra mós planu dezenvolvimentu mídia ninian, ita ko’alia kona-bá rádiu no televizaun, ne’e tenki integra iha laran,” Prezidente Konsellu Imprensa Timor-Leste, Vírgilio Guteres, ko’alia iha Oé-Cusse, sesta ne’e.
Konsellu Imprensa hakarak enkoraja autoridade RAEOA atu tau atensaun ba dezenvolvimentu rádiu komunidade, liuliu atu haree kondisaun.
Nia fó ezemplu, daudaun ne’e rádiu komunidade Oé-Cusse nia rezidénsia besik loos iha tai-ibun, ne’ebé la’ós apropriadu la’os estratéjiku ba rádiu ida.
“Rádiu ida nia tenke iha fatin aas iha sidade nia laran, nia mak tenke sai hanesan bele haree dookliu atu fó hatene komunidade sira kona-bá perigu ka kalamidade ruma, entaun fatin ne’e la estratéjiku,” nia fó hanoin.
Nia parte simu ona informasaun hosi jestór rádiu komunidade Oé-Cusse, katak uluk ZEESM hahú, iha planu atu integra dezenvolvimentu fatin ba rádiu komunidade, maibé Konsellu Imprensa hanoin katak, ba futuru rádiu komunidade bele transforma hanesan rádiu RAEOA ninian, ne’ebé nia la serbí ba komunidade nian maibé serbí ba Rejiaun Administrativa Espesiál Oé-Cusse Ambeno tomak.
“Konsellu Imprensa kontinua promete, sei fila-fali ba sentrál sei kontinua halo advokasia atu dehan, RAEOA tenke iha biru espesiál ba RTTL, biru espesiál TATOLI ninian, tanba TATOLI hanesan notisioza ofisiál, nia korrespondente tenke multi, tenke iha kapasidade, bele prodús vídeu, prodús notísia ba mídia eletrónika, ba mídia cetak no audiu visuál, nia tenki kapasidade,” nia sujere.
“Maibé ba RTTL ha’u hanoin tenke iha ekipa produsaun ida-ne’ebé permanenti iha Oé-Cusse la’os notísia de’it maibé programa ne’ebé bele garante konteúdu lokál RAEOA nian, tanba komunidade iha rai boot presiza hatene kona-bá saida maka la’o iha RAEOA, tanba orsamentu mai RAEOA ne’e tokon ba tokon,” nia katak.
Hatán ba rekomendasaun ne’e, Prezidente Autoridade RAEOA, Arsénio Paixão Bano, promete sei komunika Minitériu ba Asuntu Parlamentár no Komunikasaun Sosiál (MAPKOMS) atu estebelese biru, no rekoñese krítika média importante atu kontribui hadi’a prosesu dezenvolvimentu iha rejiaun ne’e.
“RAEOA sei komunika ho MAPKOMS atu elabora ko’alia kona-bá biru imprensa nian iha Oé-Cusse, tanba Oé-Cusse iha dalan no kompeténsia rasik no deside atu fó apoiu, tanba RAEOA iha atividade barak liga ho infraestrutura bázika no projetu nasionál sira hanesan estrada liga ba sub-rejiaun sira,” nia promete.
Jornalista : Abílio Elo Nini
Editór : Evaristo Soares Martins
