Romário Tety orgullu sai asistente árbitru iha kopa AFF U-19
DILI, 15 jullu 2022 (TATOLI)– Timoroan Romario Tety, sesta ne’e, fila hikas ona mai Timor-Leste, hafoin ramata nia misaun hanesan assitente árbitru iha jogu kopa ASEAN Football Federation (AFF) U-19 iha Jakarta-Indonézia.
Ba jornalista Agência TATOLI iha edifísiu Federasaun Futeból Timor-Leste (FFTL), Romário Tety, dehan sente kontente no orgullu hanesan timoroan dahuluk ne’ebé bele ba lidera jogu iha estranjeiru.
“Ha’u orgullu tanba hetan rekomendasaun hosi Referee Development Officer (RDO) iha Federation International Football Association (FIFA), atu sai hanesan asistente árbitru iha jogu nivél AFF U-19 iha Jakarta, foin lalais ne’e” Romário orgullu.
Notísia relevante: Romário Tety sai asistente árbitru dahuluk iha kopa AFF U-19
Durante tuun hodi akompaña jogu iha kampu laran nu’udar asistente árbitru dahuluk hetan esperiénsia lubuk ida hanesan regulamentu jogu no seluk tan.
“Iha ne’ebá, ha’u hetan buat foun barak, maibé ida ne’e esperénsia mai ha’u no ba árbitrajen Timór-Leste nian. Buat ne’ebé akontese iha ne’ebá diferente ho futeból ita nian tanba ema nia jogu ne’e ho rítmu ne’ebé aas tebes,” nia afirma.
RDO-FIFA hala’o avaliasaun ba timoroan Romário Tety katak hetan prestasaun di’ak iha jogu AFF U-19 tanba koopera tebes ho árbitru prinsipál iha eventu rejionál ne’e.
“Iha jogu abertura sira fiar kedan ha’u hodi tuun iha jogu primeiru hanesan segundu asistente árbitru, iha jogu seluk tuir ha’u deskansa tiha no tama fali sira fó ha’u hanesan assitente árbitru dahuluk. Nune’e iha jogu lima mak ha’u tun hanesan asistente árbitru dahuluk dala tolu np asistente árbitru daruak dala-rua,” nia relata.
Nune’e, nia husu ba árbitru timoroan hotu atu esforsu nafatin hodi aprende, atu nune’e iha oportunidade seluk bele partisipa hodi reprezenta nasaun atu ema hotu iha mundu bele hare Timor-Leste.
Tuir dadus, árbitru iha Timor-Leste hamutuk 567, hosi númeru ne’e árbitru lisensa A na’in-rua, lisensa B na’in-10, lisensa C na’in-60 no restu iha lisensa D.
Jornalista: Hortencio Sanchez
Editór : Florencio Miranda Ximenes
