DILI, 18 jullu 2022 (TATOLI)– Ekipa selesaun nasionál seniór Timor-Leste la konsege konkista nia vitória, bainhira hala’o jogu amigavél kontra ekipa seniór Filipina, loron sábadu (16/08) iha Bali-Indonézia, tanba ho rezultadu eskore 1-4.
“Maske, ami lakon jogu kontra Filipina foin lalais ne’e, maibé ekipa halo jogu ne’ebé di’ak, ita lakon tanba halo preparasaun durante loron 10 de’it, maibé Filipina halo preparasaun ne’ebé másimu tebes,” Treinadór Prinsipál Selesaun Nasionál Seniór, Fabio Maciel da Silva, hateten Agência TATOLI via WhatsApp foin lalais ne’e.
Notísia relevante: Aban, selesaun nasionál seniór arranka bá Bali
Treinadór ne’e, dehan iha jogu minutu dahuluk ekipa Timor-Leste hatudu prestasaun di’ak ho esforsu maka’as hodi enfrenta jogu ne’e, maibé too ikus labele konkista vitória.
Haree mós ba minutu daruak ekipa TL nafatin hatudu jogu ne’ebé di’ak, maibé ekipa Filipina halo jogu kapas hodi domina tiha kampu ne’ebé rezulta Timor-Leste tenke simu derrota.
“Ita nia jogadór sira nia performa tuun tanba durante tinan hira ikus ne’e iha Timor-Leste laiha liga ne’ebé la’o ho másimu atu jogadór sira bele book aan bebeik, nune’e kontribui mós ba performa jogadór selesaun nian tanba jogadór maioria joga iha liga,” nia afirma.
Daudaun ne’e, Prezidente Federasaun Futeból Timor-Leste (FFTL), Francisco Jerónimo, hahú esforsu an hodi hetan apoia hosi FIFA atu dezenvolve futeból iha Timor-Leste.
“Iha tinan oin mai ita fiar bele halo mudansa ba futeból Timor-Leste nian,” nia relata.
Tanba ne’e, Treinadór Prinsipál ne’e husu ba bola-mania hotu iha Timor – Leste atu fó liman ba malu hodi dezenvolve futeból, liuliu bele halo krítiku, maibé krítiku ne’ebé konstrutivu hodi hadi’a futeból iha nasaun ne’e.
Notísia relevante: Selesaun nasionál seniór hahú treinu tékniku no fíziku iha Bali
Jornalista: Hortencio Sanchez
Editór : Florencio Miranda Ximenes
