Autoridade RAEOA mellora koñesimentu tékniku agríkola
OÉ-CUSSE, 19 jullu 2022 (TATOLI) – Sekretáriu Rejionál ba Asuntu Agrikultura, liuhosi Departamentu Estensaun Agríkola iha Rejiaun Administrativa Espesiál Oé-Cusse Ambeno (RAEOA), fasilita formasaun ba tékniku sira kona-bá tékniku metodolojia agríkola nian hodi mellora serbisu agrikultura iha rejiaun ne’e.
Sekretáriu Rejionál ba Asuntu Agrikultura, José Eta, informa, formasaun ne’e realiza durante loron tolu, hahú tersa ensera iha kinta semana ne’e, fokaliu ba tékniku sira mai hosi deprtamentu estensaun agríkola, peska no floresta hodi hasa’e sira-nia koñesimentu kona-bá téknika metodologia agríkola atividade rural, liuliu ba tékniku sira iha diresaun agrikultura nian.
Nia hatete, objetivu hosi formasaun ne’e atu hala’o atendimentu di’ak liután ba agrikultór sira iha suku, halo akompañamentu téknika no halo fornesimentu informasaun hosi agrikultór sira ba diresaun relevante.
Nune’e mós buka hatene problema saida mak agrikultór sira enfrenta hosi buka alternativa atu rezolve, tanba tékniku sira mai hosi estensionista, floresta hamutuk ho peska, loron-loron serbisu hamutuk ho agrikultór iha baze.
“Ita-nia estensionista sira maka loron-loron akompaña komunidade iha baze, iha área ortikultura, to’os modo, rai-maran, natar, planta indústria sira, área peska no pekuária, tán ne’e parte diresaun fornese nafatin kapasitasaun ba tékniku sira atu aumenta sira-nia koñesimentu iha área téknika akompañamentu iha baze, liuliu kona-bá metodolojia agríkola,” José Eta, hatete iha Oé-Cusse, tersa ne’e.
Nia fó-sai katak, iha 2021 tékniku estensaun na’in-lima dezloka ba iha nasionál partisipa ona formasaun iha Ministériu Agrikultura no Peska (MAP), durante semana rua iha munisípiu Ermera, nune’e bainhira fila mai Oé-Cusse fasilita kapasitasaun ba tékniku sira, nune’e bainhira tún iha baze ajuda komunidade ba serbisu agrikultura nian.
Dirijente agrikultura ne’e, enkoraja tékniku formandu sira durante loron tolu saida maka hetan ona iha formasaun ne’e, bele introdús iha kna’ar idak-idak nian, tanba performance idak-idak nian maibé komún nível departementu nian, entaun presiza hamutuk mellora di’ak liután serbisu agrikultura nian iha rejiaun ne’e.
Nune’e nia parte orgullu tanba funsionáriu ne’ebé integra iha diresaun agrikultura kuaze destaka hotu iha nivél suku no aldeia.
“Ha’u akompaña durante ne’e kuandu ami halo viajen bai ha baze, ita haree iha fatin barak kolega sira iha hotu, ida-ne’e hatudu mai serbí nasaun serbisu ba povu Oé-Cusse, tanba nasaun ne’e selu ita atu hadi’a ita-nia rai hahú hosi baze,” nia fó hanoin.
Estensionista hosi suku Cunha sub-rejiaun Pante Makasar, Marcelino da Rosa, hato’o agradese ba diresaun rejionál agrikultura tanba fó biban ba sira atu partisipa formasaun, hodi aumenta koñesimentu nu’udar tékniku agrikultura iha baze.
“Formasaun ne’e importante ba ami hanesan tékniku iha baze, tanba bainbain ami mak hamutuk ho inan-aman sira iha baze, entaun liuhosi formasaun ne’e bele aumenta ami-nia koñesimentu ba atendimentu direita ba komunidade, tantu tékniku ho desizaun hotu molok, relata mai diresaun,” nia orgullu.
Purtantu, totál tékniku estensionista suku iha Rejiaun Administrativa Espesiál Oé-Cusse Ambeno hamutuk na’in-24 ne’ebé destaka iha suku 18 no sub-rejiaun haat.
Jornalista : Abílio Elo Nini
Editór : Evaristo Soares Martins
