Projetu sentru viveru iha Lela-Ufe Nítibe atinje 42%

OÉ-CUSSE, 20 jullu  2022 (TATOLI) – Projetu konstrusaun ba sentru viveru iha suku Lela-Ufe, sub-rejiaun Nítibe, Rejiaun Administrativa Espesiál Oé-Cusse Ambeno (RAEOA), daudaun ne’e atinje ona 42%, ho medida metru 20×40 sei akumula ai-oan rihun 20-resin.

Sekretáriu Rejionál ba Asuntu Agrikultura, José Eta, informa, iha 2021 autoridade RAEOA liuhosi Sekretáriu Rejionál Agrikultura, estabelese sentru viveru komunitária rua, ida iha sub-rejiaun Nítibe iha suku Lela-Ufe no ida iha sub-rejiaun Oésilo konstrui iha suku Bobometo.

Nia hatete, objetivu hosi estabelesimentu sentru sentru viveru sira-ne’e atubele hakbesik liután, nesesidade komunidade liuliu agrikultór-sira bainhira atu persiza ai-oan, atu kuda no halo reflorestasaun ba bee-matan sira-ne’ebé identifika ona iha 2021.

“Objetivu atu fasilita komunidade  suku lima iha sub-rejiaun Nítibe bainhira presiza ai-oan atu halo reflorestasaun, ne’ebé iha  semana kotuk ita halo ona fiskalizasaun ba projetu ne’e, no  nia serbisu tomak atinje ona 42%, tanba konstrusaun ne’e importante atu atende komunidade suku lima iha sub-rejiaun Nítibe, hanesan suku Ban-Afi, Lela-Ufe, Usitaku, Bene-Ufe no Suni-Ufe,” José Eta, hatete iha Oé-Cusse, tersa ne’e.

Nia afirma, sentru viveru konstrui iha suku Lela-Ufe, sub-rejiaun Nítibe ho nia medida metru 20×40 ho nia área kapasidade, bele akumula espésie ai-oan rihun 20-resin.

“Ita prepara de’it ai-oan ne’ebé nia tipu bele hakiak bee atu fó moris ba komunidade, hanesan futeras ai-fuan-sira, atu kondis ho poténsia ne’ebé iha suku no aldeia, ba ai-teka kuaze tinan rua ona, ita la prepara tanba populasaun ai-teka iha Oé-Cusse, ai-teka lokál, ai-teka manila ho super kuaze barakliu ai-horis sira seluk, ne’e hanesan indikadór ida ba problema bee iha Oé-Cusse,” nia katak.

Xefe suku Lela-Ufe, José Neno Sila, orgullu tanba liuhosi sentru viveiru ne’e bele tulun komunidade iha Nítibe nian bainhira presiza ai-oan sei la to’o vila ona tanba autoridade RAEOA prepara ona iha kada sub-rejiaun sira.

“Ha’u hanesan autoridade komunitáriu agradese tanba desde 2021 autoridade halo konservasaun ba bee-matan sira, entaun projetu ida-ne’e bele fasilita ona komunidade sira atu kuda iha bee-matan sira, hanesan ha’u-nia iha bee-matan hitu hanesan tama tara-bandu hotu,” nia orgullu.

Projetu ne’e ezekuta hosi empreza lokál, Kloenifu Unipesoál, Lda, ho valór kontratu hamutuk rihun $73-resin ($73,264.94),  ne’ebé  autoridade RAEOA prevee iha Orsamentu Jerál Estadu (OJE) 2021.

Jornalista   : Abílio Elo Nini

Editór         : Evaristo Soares Martins