Fundu kontributivu veteranu sa’e ba millaun $25
OÉ-CUSSE, 21 jullu 2022 (TATOLI) — Sekretáriu Estadu ba Asuntu Veteranu Kombatente Libertasaun Nasionál, Júlio da Conceição, ‘Loro Mesak’ hateten, fundu kontributivu veteranu ne’ebé kada fulan ko’a $30 hosi veteranu sira, daudaun ne’e to’o ona millaun $25-resin ho nia funan atinje ona rihun $400-resin iha konta fundu veteranu nian.
“Fundu ne’ebé veteranu sira rasik kria, agora sa’e ona ba millaun $25-resin, hosi fundu ne’e mai hosi veteranu nia osan kada fulan ko’a $30, tanba osan ne’e hasai hosi bolsu sorin tau ba bolsu sorin laiha ema ida maka barani atu foti osan ne’e, daudaun ne’e osan ne’e nia funan rihun $400-resin ona, maibé seidauk halo buat ida,” Loro Mesak ko’alia iha ámbitu lansamentu programa Naroman ba Suku iha Bobometo Oé-Cusse, kuarta ne’e.
Nune’e, Sekretáriu Estadu ba Asuntu Veteranu Kombatente Lidertasaun Nasionál, Júlio da Conceição, ‘Loro Mesak’ ajenda ona katak, iha segunda semana oin hamutuk ho Prezidente Konsellu Kombatente Libertasaun Nasionál halo audiénsia ho Primeiru Ministru, atu haree osan ne’e atu halo saida, tanba osan ne’e nia montante sa’e beibeik ona.
“Ita-nia planu prioridade primeiru maka ne’e tenke loke banku ba veteranu sira, tanba iha Timor-Leste iha banku barak, maibé bainhira veteranu sira ba asesu hodi osan laiha kondisaun tratamentu ne’ebé dignu, tanba moto veteranu nian maka, na’in ba ukun-aan no rin ba nasaun, maibé realidade na’in ba habai-aan iha banku sira atu foti osan, entaun veteranu tenke kria rasik nia banku,” nia promete
Entretantu, hosi osan kontributivu veteranu millaun $25-resin ne’e mai hosi benefisiáriu hamutuk na’in-27.828.
Governante ne’e sei forma ekipa atu tún iha baze hodi halo sensibilizasaun kona-bá osan ne’ebé Parlamentu Nasionál aprova millaun $1 ba Sekretaria Estadu ba Asuntu Veteranu Kombatente Lidertasaun Nasionál, hodi halo atividade sosiál,
“Entaun osan ne’e sai maibé iha futuru kuandu implementa ami sei tún mai sensibiliza, kona-bá lala’ok osan ne’e, la’ós atu mai fahe de’it maibé sei bele balu uza ba kréditu, balu haree veteranu nia oan sira ba eskola, trata sira-nia saúde,” Loro Mesak hatete
Jornalista : Abílio Elo Nini
Editór : Evaristo Soares Martins
