OÉ-CUSSE, 26 jullu 2022 (TATOLI) – Diretór Rejistu Sivíl Notariadu Konservatóriu, Rejiaun Administrativa Espesiál Oé-Cusse Ambeno (RAEOA), José Ase Neno Colo, fó-sai katak iha fulan agostu tinan ne’e sei halo asisténsia rejistu movél ba komunidae sira iha sub-rejiaun Oésilo, Pássabe no Nítibe kona-bá dokumentu komprovativu hanesan billete identidade no sertidaun RDTL.
“Tanba dokumentu rua ne’e billete identidade ho seridaun RDTL mak komprova ita ne’e sidadaun Timor-Leste, sei komunidade laiha entaun nia la’ós sidadaun ita-nian,” Diretór Rejistu Sivíl Notariádu Oé-Cusse, José Ase Neno Colo, ko’alia iha Santa Rosa, Oé-Cusse, segunda ne’e.
Tuir nia haree, iha Oé-Cusse ema barak sedauk iha dokumentu komprovativu, entaun daudaun ne’e, parte rejistu sivíl komunika ona ho parte nasionál, no ajenda ona tuir planu atu halo rejistu movél ba labarik tinan lima mai kraik, inklui inan-aman sira-ne’ebé idade ona la konsege halo tanba distánsia dook.
“Entaun iha agostu ne’e ita sei hamutuk ho parte nasionál atu fó asisténsia rejistu movél ba komunidade iha sub-rejiaun sira, kada sub-rejiaun ida sei atende durante semana ida, mak kontinua fali ba sub-rejiaun seluk,” nia katak.
Nia informa, rejistu movél ne’e sei foka ba sub-rejiaun tolu, Oésilo Pássabe no Nítibe tanba razaun distánsia dook, movimentu atu mai Pante Makasar difikuldade mak transporte, tán ne’e maka parte rejistu sivíl fasilita atu halo rejistu movél ba iha sub-rejiaun sira, razaun seluk tanba besik-liu fronteira, nune’e bainhira atu movimentu iha iha liña fronteira tenke iha dokumentu komprovativu nu’udar sidadaun timor-oan.
Tuir nia, tanba daudaun ne’e Governu kria ona programa bolsa da mãe jerasaun foun, parte Ministériu Solidariedade Sosiál iha RAEOA, komunika ona iha rejistu atu fasilita hodi prodús dokumentu komprovativu sira hanesan, billete identidade no sertidaun RDTL.
Nia dehan, rekizitu dokumentu ne’ebé presiza iha rejistu movél, ba joven sira presiza prepara sertidaun batizmu no inan-man nian, nomoos sertidaun kazamentu, nomoos ba sira-ne’ebé idade boot prepara de’it sertidaun batizmu, nune’e bele konfere naran sira hotu tenke uniformiza atu hanesan.
Kona-bá billete identidade prepara de’it sertidaun RDTL, foto kolorida tahan rua, grupu sangue no la presiza ona deklarasaun hosi xefe suku.
“Tanba ita-nia komunidade barak mai reklama katak, bainhira atu hasai billete identidade buka autoridade suku susar tebes, presiza gasta osan atu buka entaun ho ida-ne’e maka parte rejistu sivíl fó-sai aviza, la presiza ona deklarasaun xefe suku, prepara de’it dokumentu sira hanesan sertidaun no billete identidade,” nia katak.
Nune’e, molok atu realiza asisténsia rejistu movél, parte rejistu sivíl notariadu RAEOA sei fó aviza ba autoridade komunidade sira iha sub-rejiaun atu prepara dokumentu sira no mobiliza komunidade konsentra iha fatin ida, nune’e bele halo tratamentu ba dokumentu sidadaun nian.
Agostinho Afulit, hosi suku Bene-Ufe, sub-rejiaun Nítibe, orgullu tanba bele fasilita ona komunidade sira-ne’ebé hela iha área rurál.
“Ha’u orgullu kuandu agostu halo rejistu movél ne’e ajuda tebes inan-aman sira iha baze, atu hetan dokumentu sidadania nian, billete identidade, sertidaun RDTL tanba durante ne’e komunidade preokupa ho dokumentu hirak-ne’e sedauk iha, agora atu mai halo maibé problema estrada,” nia orgullu.
Jornalista : Abílio Elo Nini
Editór : Evaristo Soares Martins
