EKONOMIA, HEADLINE, MUNISÍPIU, OÉ-CUSSE (RAEOA)

RAEOA kria polítika CBM insentiva komunidade hadi’a rasik estrada iha suku

RAEOA kria polítika CBM insentiva komunidade hadi’a rasik estrada iha suku

Autoridade RAEOA kria polítika CBM insentiva komunidade hadi'a rasik estrada iha suku. Imajen espesiál

OÉ-CUSSE, 26 jullu  2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), lidera Arsénio Pixão Bano, kria polítika ho naran Community Based Maintenance (CBM), hodi fasilita komunidade ho insentiva atu hadi’a rasik estrada sira iha nível suku no aldeia iha territóriu Oé-Cusse.

Sekretáriu Rejionál ba Asuntu Agrikultura, José Eta, informa, programa ne’e autoridade RAEOA lansa ona iha sesta semana kotuk iha aldeia Kinloki, suku Naimeko, sub-rejiaun Pante Makasar hamutuk ho xefe suku 18 no jestór sira iha sub-rejiaun Oésilo, Pássabe, Nítibe no Pante Makasar.

“Programa ida-ne’e di’ak tebes ba komunidade sira atu hadi’a rasik idak-idak nia bairru, aldeia no suku liuhosi atividade hamoos no taka rai-ku’ak sira iha estrada rural, tantu estrada nasionál, atu fasilita movimentu komunidade no transporte. Nune’e mós iha objetivu atu asegura sirkulasaun osan iha nível komunidade, tanba kada ema ida hetan $3 tolu kada loron,” José Eta, informa iha Oé-Cusse, segunda ne’e.

Nia apela ba autoridade komunitáriu sira atu koopera ho tékniku sira hosi Diresaun Rejionál Infraestrutura (DRI) hodi organiza komunidade sira atubele implementa programa CBM ho di’ak, tanba programa ne’e envolve direita komunidade komunidade hamutuk 200, kada grupu ema na’in-21 ho totál ema hamutuk 4.200 ne’ebé kobre ba distánsia estrada kilómetru 216 iha territóriu RAEOA.

“Tanba ita-nia dezenvolvimentu iha Oé-Cusse la’o ho fazeadamente, maibé presiza komunidade liuliu lideransa komunitáriu sira atu koopera ho autoridade nune’e bele hala’o dezenvolvimentu hirak-ne’e ho di’ak, tanba projetu nasionál hanesan estrada ba sub-rejiaun sira sei hahú iha tinan ne’e,” nia fó hanoin.

Xefe suku Naimeko, Marcos Liu, agradese ba Autoridade RAEOA liuhosi Diresaun Rejional Infrastrutura ne’ebé iha inisiativa loke Programa CBM hodi asegura envolvimentu komunidade ba prosesu manutensaun estrada sira. Nune’e mós programa CBM ajuda komunidade sira atu hetan osan hodi responde nesesidade uma laran.

Jornalista   : Abílio Elo Nini

Editór         : Evaristo Soares Martins

iklan
iklan

Leave a Reply

iklan
error: Content is protected !!