EKONOMIA, HEADLINE, MUNISÍPIU, OÉ-CUSSE (RAEOA)

Projetu merkadu tradisionál Baoknana atinje 60%

Projetu merkadu tradisionál Baoknana atinje 60%

Konstrusaun ne’ebé la’o iha merkadu tradisionál Baoknana. Imajen mídia ZEESM.

OÉ-CUSSE, 27 jullu  2022 (TATOLI) – Projetu ba merkadu tradisionál Baoknana ne’ebé lokaliza iha aldeia Citrana, suku Bene-Ufe, sub-rejiaun Nítibe, daudaun ne’e nia progresu fíziku atinje ona 60%.

Sekretáriu Rejionál ba Asuntu Komérsiu no Indústria, Pedro da Silva Boquifai, informa, autoridade hala’o fiskalizasaun ba projetu konstrusaun edifísiu merkadu Baoknana ho objetivu atu observa no halo monitorizasaun serbisu hodi hatene progresu hosi projetu refere.

“Konstrusuan tarde uitoan tanba mumentu harii iha situasaun udan, depois mobilizasaun materiál barak mai hosi Dili mumentu ne’e ró la halo operasaun entaun afeta ba konstrusaun ne’e, maibé tuir kontratu empreza sei termina iha fulan-abríl, entaun ha’u orienta ona ba empreza atu submete pedidu estensaun atu labele prezudika sira iha futuru, maibé agora nia progresu atinje ona 60%,” Pedro da Silva Boquifai, informa ba Agência Tatoli liuhosi telefónika, kuarta ne’e.

Nia fó-sai katak, merkadu ne’e presiza halo tanba tuir observasaun, negosiante sira fa’an sasán balu tuir de’it iha rai, no ai-mahon sira, entaun autoridade hatama fatin ne’e iha Planu Asaun Anuál iha tinan fiskál 2021 atu hadi’a, konstrusaun  merkadu tradisonál ne’e.

Nune’e autoridade RAEOA hatuur fatuk dahuluk iha dezembru 2021, no tuir kontratu empreza tenke termina obra ne’e iha tinan ne’e, tanba konstrusaun ne’e konstrui ho pakote ida, hanesan uma ba merkadu ho nia médida 12×8, hariis-fatin públiku ida (1), postu seguransa no fatin soe lixu unidade-rua (2) nune’e bele fasilíta komunidade sira fila-liman ho dignu.

Entretantu, projetu ne’e ezekuta hosi empreza Neno Unipesoál, Lda, ho valór kontratu $57,727.00 ne’ebé aloka hosi Orsamentu Jerál Estadu (OJE) 2021.

Maibé montante orsamentu ne’ebé Agência Tatoli asesu liuhosi livru 3-C (RAEOA-ZEESM) mensiona katak, orsamentu Jerál Estadu (OJE) 2021 ba RAEOA iha tinan fiskál 2021 ho montante $127,000.000.

Hosi montante ne’e koloka $30,000.00 ba konstrusaun merkadu Baoknana (Detailed and Evaluation of Bids for Improvement of Baoknana Market), no projetu ne’e tama iha planu asaun anuál RAEOA nian.

Notísia relevante: RAEOA aloka rihun $57-resin konstrui merkadu tradisionál Baoknana

Jornalista   : Abílio Elo Nini

Editór         : Evaristo Soares Martins

iklan
iklan

Leave a Reply

iklan
error: Content is protected !!