DILI, HEADLINE, INTERNASIONÁL

PM Taur lamenta ho aktu violentu timoroan iha rai-li’ur

PM Taur lamenta ho aktu violentu timoroan iha rai-li’ur

Primeiru-Ministru, Taur Matan Ruak. Imajen Tatoli/Egas Cristóvão.

DILI, 28 jullu 2022 (TATOLI)—Primeiru-Ministru (PM), Taur Matan Ruak, lamenta ho aktu violentu timoroan balun iha rai-li’ur.

Primeiru Ministru hato’o kestaun ne’e relasiona ho vídeo ne’ebé espalla virál daudaun iha rede sosiál hodi hatudu aktu violentu entre joven timoroan balun iha Reinu Unidu.

“Hau triste loos, timoroan uluk kuandu ita luta iha fatin-fatin ne’e jagoan luta ba ukun-an foti bandeira Timor maibé agora balun iha estranjeiru hatun fali ita-nia bandeira,” PM Taur hateten ba jornalista sira hafoin hala’o enkontru ho Prezidente Repúblika, José Ramos Horta, iha Palásiu Prezidensiál Nicolau Lobato, Bairru Pite, Dili, kinta ne’e

Xefe Governu ne’e konsidera aktu ida-ne’e fó imajén la di’ak ba ba nasaun Timor-Leste, nune’e presiza hatudu komportamentu di’ak.

“Ne’e fó imajen ida ladun di’ak no ita Timor ne’e so hatene mak halo problema ne’e labele. Ha’u hanesan maun, aman no hanesan Primeiru-Ministru apela ba ha’u-nia oan no sidadaun sira komportamentu ne’e tenke di’ak. Ita nasaun ida entaun ita-nia komportamentu ne’e tenke sivilijadu,” Xefe Govenu apela.

Tamba, Taur hateten, aktu violentu ne’ebé entre timoroan ho timoroan halo ba malu iha fatin no nasaun seluk ne’e hafoer Timor-Leste nia naran.

“Sira mak halo iha li’ur ne’eba, ita iha ne’e mak lori todan maibé pelu kontráriu aktu ema ida ka ema na’in-rua nia hahalok. Atu hateten katak ita repodia (rezeita), ita la gosta no ita lakohi atu sira revee sira-nia komportamentu, hatudu buat ne’ebé di’ak. Nune’e, hamorin la’ós de’it joven sira-nia naran, sira-nia família maibé halo mós ita-nia nasaun nia naran orgullozu loos tanba reprezenta sira lori ita-nia bandeira iha fatin-fatin,” Taur hateten.

Jornalista : Nelson de Sousa

Editór       : Cancio Ximenes

iklan
iklan

One Comment

  1. Ha’u sente Sr- PM hatene hela sé maka halo violénsia sira-ne’e. GAM loos ka lae? Ita presiza hatene katak Timor agora daudaun hakat ona ba buat ida naran Fundamentalizmo Grupu Arte Marsiál nian.

Leave a Reply

iklan
error: Content is protected !!