DILI, 02 agostu 2022 (TATOLI)—Prezidente Konsellu Administrasaun Institutu Nasionál Seguransa Sosiál (INSS), Longuinhos Armando Leite, hateten INSS prontu koopera bainhira Komisaun Funsaun Públika (CFP-sigla portugés) dehan funsionáriu públiku (FP) sira ho idade 60 tenke reforma hosi nia servisu.
Notísia Relevante: PN presiza tau prioridade alterasaun lei SS ba funsionáriu reformadu sira
“Ami prontu karik funsaun públika dehan idade 60 tenke reforma hosi sira-nia servisu,” Prezidente INSS hateten ba Agência TATOLI iha nia kna’ar fatin Caicoli, Dili.
Nia hateten, funsionáriu reformadu KFP mak deside no kria lei hodi reforma, INSS simu de’it funsionáriu hira mak atu reforma.
“Ami hein de’it hosi funsaun públika karik haruka karta mai dehan ema ne’e reforma ona maibé tanba laiha lei ida mak hateten dehan idade 60 ne’e tama ona idade reformadu. Ha’u rona ona katak funsaun públika atu halo lei ida hodi regula ba profesór sira-ne’ebé tama ona idade 60 ne’e tenke reforma hotu,” Prezidente INSS hateten.
Ida-ne’e di’ak tanba atu bele fó oportunidade ba jerasaun foun sira no ajuda Governu atu labele selu beik-beik sira no sira simu de’it sira-nia pensaun ne’e, atu nune’e 6% ne’e selu ba funsionáriu foun sira, se lae idade avansadu mós servisu nafatin no 6% ne’e mós simu nafatin.
Ba funsionáriu públiku sira laiha problema tanba sira tama sistema ba seguransa sosiál nian, ne’eduni sira iha direitu ona.
“Ba profesór sira-ne’ebé idade 60 ne’e sei barak maibé ami laiha dadus ba ida-ne’e tanba funsionáriu ida mai servisu iha ne’e hodi simu saláriu la hakerek nia idade mai. Maibé profesór sira-ne’ebé idade tama reforma ne’e ami iha dadus hamutuk 100-resin.
Hosi totál ne’e, nia dehan, sira simu direitu seguransa sosiál no reforma ona ne’e INSS iha kritériu hnesan ema (funsionáriu) ne’e nia servisu tinan hira, nia kontribuisan, no mudansa saláriu hanesan tama foun-foun $200 sa’e ba $500 ka oinsá.
“Ami sei haree buat sira-ne’e hotu hafoin mak ita bele deside nia atu simu hira bainhira nia reforma hosi nia servisu. Ita-nia preokupasaun mak iha balun idade liu ona 60 maibé ativu nafatin hanesan funsionáriu públiku,” nia dehan.
Rejime jerál ne’e, Prezidente INSS hateten katak hahú iha outubru 2017 no funsionáriu barak mak trata ona.
Jornalista : Osória Marques
Editór : Cancio Ximenes
