CNCCTI-IG identifika labarik 40% iha territóriu nasionál la asesu edukasaun
DILI, 04 agostu 2022 (TATOLI)–Prezidente Komisaun Nasionál Kontra Kombate Traballu Infantil no Inspesaun Jerál (CNCCTI-IG, sigla portugés), Aniceto Leto Soro, hateten tuir rezultadu peskiza ne’ebé mak CNCCTI-IG halo iha territóriu nasionál hatudu katak labarik 40% mak la asesu eduksaun.
Notísia Relevante: CNCCTI-IG relata Traballu Infantil iha TL hamutuk 52.000 ba Xefe Estadu
“Labarik iha Timor-Leste 40% mak la asesu ba edukasaun katak labarik sira-ne’e halo ema-nia atividade ka faan sasán hodi sustenta família nia moris ka hakonu de’it ema ida-rua nia hakarak,” Prezidente CNCCTI-IG ne’e informa ba Agência Tatoli, iha nia knar fatin Hudi-laran, Dili.
Hosi 40% ne’e, labarik halo atividade faan ne’ebé mak nia inan-aman ka ema seluk mak haruka sira ba halo servisu.
“Labarik halo ida-ne’e tanba nesesidade mak haruka tenke halo atividade faan,” Leto soro dehan.
Nia hatutan, hosi labarik 60% ne’ebé mak asesu ba eskola ne’e iha labarik balun ne’ebé iha daddeersan ka lorokraik hala’o sira-nia atividade aprendizajen iha eskola no hafoin sai hosi eskola sira hirak ne’e hala’o atividade faan sasán tuoir sira hakarak.
“Maibé ida-ne’e sei prejudika nafatin sira-nia estudu tanba dala ruma sira ba servisu fila mai uma labele estuda, tanba kolen entaun halo sira-nia valór ladi’ak no prejudika mós ba sira-nia saúde no mentalidade,” nia dehan.
Prezidente CNCCTI-IG ne’e esplika katak traballu infantil ne’e bandu no traballu menór ne’e la bandu, signifika traballu menór ne’e labarik ho idade 13-15 bele halo servisu no servisu ida-ne’ebé mak la prejudika ba nia edukasaun, saúde no la prejudika ba nia dezenvolvimentu fíziku.
Nia dehan, labarik sira labele halo servisu todan no la liu kilograma 15 tanba kilograma 10 ba labarik feto no kilograma 15 ba mane, maibé traballu infantil mak labarik ho idade 12 mai kraik ne’ebé mak halo servisu maibé ne’e konsidera hanesan halo servisu todan ka aat.
Nia informa, labarik sira-ne’ebé mak halo servisu barak liu iha Timot-Leste ne’’e mak labarik sira hosi munisípiu Aileu, Dili, Ermera, Lautém no Covalima.
Nune’e, CNCCTI-IG nia objeitvu mak atu halo sensibilizasaun ba inan-aman no ema-ne’ebé mak sai xave importante mak lei. Sensibilizasaun ne’e, oinsá mak inspetór sira halo servisu ne’ebé mak di’ak, ida-ne’e presiza rekomenda ba parte relevante no tenke tau orsamentu ne’ebé propriu no adekuadu atu implementa planu ne’e.
“Tanba ne’e presiza família liu-liu inan-aman sira tenke dignifika labarik sira-nia direitu hodi akompaña oan sira-nia atividade loro-loron ba fasilidade ne’ebé mak Governu oferese ona,” nia dehan.
Notísia Relevante: CNCCTI-IG relata rekomendasaun neen traballu infantil ba MKAE
Jornalista : Osória Marques
Editór : Cancio Ximenes
