OÉ-CUSSE, 08 agostu 2022 (TATOLI) – estudante hamutuk 25,470 komposta hosi ensinu pré-eskolár, ensinu báziku to’o ensinu sekundáriu jerál no tékniku vokasionál iha Rejiaun Administrativa Espesiál Oé-Cusse Ambeno (RAEOA), partisipa iha realizasaun ezame ba períodu daruak tinan ne’e.
Diretór Edukasaun RAEOA, Daniel Mauno, informa, realizasaun ezame períodu daruak ne’e ba nível ensinu hotu, komposta hosi ensinu pré-eskolár hamutuk 1,019, ensinu báziku hosi primeiru siklu to’o terseiru siklu hamutuk 20,572, nomoos ensinu sekundáriu jerál no tékniku vokasionál hamutuk 3,879.
“Ohin, ita realiza ezame segundu períodu, tanba ne’e tama ona iha kaléndariu nasionál, ho nune’e iha Oé-Cusse ohin eskola sira hotu halo ezame, kona-bá preprasaun, diresaun hamutuk ho eskola prepara ona antes semana ida, liuliu ba profesór sira oinsá atualiza pontu ezame ho di’ak atu nune’e labarik sira bele serbisu ho di’akliu,” Daniel Mauno, informa ba Agencia Tatoli iha Oé-Cusse, segunda ne’e.
Tuir nia, antes ne’e Diresaun Rejionál Edukasaun mós iha ona atuasaun apoia orsamentu, atu fasilita kada eskola sira bele hola tinta, surat-tahan hodi prodús pontu ezame, ida-ne’e distribui ona iha semana kotuk ba diretór eskola hotu-hotu.
“Dadus estudante kada eskola presiza kompletu nia estudante tenke partisipa hotu, tán ne’e persiza valór segundu períodu nian, nune’e to’o terseiru períodu ezame finál nian tenke soma hamutuk mak hafoin determina, aprovadu ka reprovadu, mak laiha valór segundu períodu entaun ne’e prezudika labarik bele la pasa,” nia akresenta.
Nia fó-sai katak, kona-bá osan konsesoen eskolár, diresaun edukasaun aloka depende hosi númeru estudante, ba sekundária sira kada ema ida hetan sentavu 0,50, ba ensinu báziku sentavu 0,40, ba tékniku vokasionál $1, maibé montante ne’e iha ona mudansa maibé seidauk hetan dokumentu legalizasaun.
Diretór Eskola Sekunária Gerál (ESG, sigla portugés) Palaban, Cristino Nunes, hatete, iha kalendáriu hatuur ona katak, hahú loron 08 agostu to’o 13, ne’e realiza ezame períodu daruak ba anu letivu 2022, ba materia didátiku iha eskola, antes semana ida parte eskola prepara ona fixa ba ezame nian.
Nune’e totál estudante ne’ebé hala’o estudu iha Eskola Sekundária Jerál Palaban hamutuk 890, komposta hosi primeiru anu, segundu anu no terseiru anu.
Jornalista : Abílio Elo Nini
Editór : Evaristo Soares Martins
