DILI, 08 agostu 2022 (TATOLI)–Governu Timor-Leste hato’o solidariedade ba Governu no povu kubanu, ba akontesimentu ahi han maka’as iha depózitu kombustível nian, besik sidade Matanzas, parte oeste Kuba, kuaze kilómetru 100 hosi leste Havana.
“Ami-nia hanoin daudaun ne’e maka ho povu kubanu, liuliu ba ema hotu ne’ebé pesoalmente afeta hosi inséndiu terrível ida-ne’e no ami-nia saudasaun ba sira ne’ebé iha kondisaun ne’ebé susar tebes atu kontinua kombate inséndiu ne’e hodi tulun populasaun sira ne’ebé afeta hosi katástrofe ida-ne’e,” Portavós VIII Governu no Ministru Prezidénsia Konsellu Ministru, Fidelis Manuel Leite Magalhães, hateten liuhosi nota ne’ebé Agência Tatoli asesu, segunda ne’e.
Notísia relevante: Kuba hakarak apoia Timor-Leste loke fábrika medikamentu
Ho rai-lakan kona tanke armazen kombustível ida iha loron sesta (05/08/2022), provoka inséndiu ne’ebé da’et mós ba tanke daruak iha loron sábadu, ne’ebé ikus mai rezulta pelumenus ema ida mate, kanek 121 no na’in-17 lakon, enkuantu abitante 1.000 resin ne’ebé hela iha área besik fatin akontesimentu evakua ba fatin provizóriu.
Tanke rua ne’ebé ahi-han nu’udar parte hosi área ida armazen kombustível nian ho tan tanke neen ne’ebé uza ba produsaun eletrisidade nian.
Jornalista : Antónia Gusmão
Editora : Julia Chatarina
