EKONOMIA, HEADLINE, MUNISÍPIU, OÉ-CUSSE (RAEOA)

Perfurasaun sistema bee-moos benefísia komunidade 900 iha Lalisuk

Perfurasaun sistema bee-moos benefísia komunidade 900 iha Lalisuk

OÉ-CUSSE, 08 agostu  2022 (TATOLI) – Projetu perfurasaun sistema bee-moos ne’ebé autoridade Rejiaun Administrativa Espesiál Oé-Cusse Ambeno (RAEOA) konstrui iha suku Lalisuk, sub-rejiaun Pante Makasar benefísia direta ba komunidade hamutuk 900 ekivalente ba uma-kain 185.

Nune’e iha sábadu semana kotuk, Autoridade RAEOA, liuhosi Sekretária Rejional Adjunta Prezidente Autoridade ba Asuntu Reforsu Instituisional, Leonia da Costa Monteiro, halo ona inaugurasaun hodi entrega ba komunidade sira atu uza ba nesesidade.

Projetu perfurasaun bee-moos ne’e lokaliza iha aldeia Padiae, suku Lalisuk, ne’ebé ezekuta hosi empreza Nun Mabun Unipessoál Lda, ho valór kontratu $151,048.77 hodi konstrui tanki tolu (3) no instala torneira públiku hamutuk unidade 13.

Projetu ne’e ezekuta durante fulan-haat (4), no rezultadu benefísia direta komunidade sira iha aldeia Padiae Sentrál, bairru Oélilah, Nijamtasa no aldeia Manuimpena, bairru Fatusene ho totál benefisiáriu hamutuk 900 ba uma-kain 180.

Adjunta Prezidente Autoridade RAEOA, atuál Sekretária Rejional ba Asuntu Reforsu Instituisional, Leonia da Costa Monteiro, informa, politíka prioridade Autoridade nian hahú hosi 2021 to’o 2022, ba infraestrutura bázika.

“Iha sábadu semana kotuk autoridade entrega ona ba komunidade sira atu uza, projetu barak kona-bá bee-moos ita harii ona iha fatin-fatin atu fasilita komunidade sira hosi bele asesu ba bee-moos nian. La’ós ne’e de’it dezde tinan kotuk to’o tinan ne’e ita foka liu ba prioridade sira hanesan, eletrisidade, bee-moos, harii eskola no melloramentu estrada, ba perfurasaun bee-moos akumula ona iha sub-rejionál haat, harii iha suku sira hodi dada ba bairru, nune’e bele fasilita komunidade atu asesu bee-moos ho di’ak,” Leonia da Costa Monteiro, informa ba Agência Tatoli liuhosi telefónika, segunda ne’e.

Nia apela nafatin ba autoridade komunitáriu hamutuk ho komunidade sira, kuidadu nafatin obra sira-ne’ebé autoridade halo ona, tanba obra hirak-ne’e autoridade harii ho osan Estadu nian.

Entaun obra ne’ebé autoridade konstrui iha povu nia leet tenke fó benefísiu direta ba povu, nune’e nia espera obra hirak-ne’e bele dura iha tempu naruk, atu kontinua fó atendimentu di’ak ba komunidade.

Xefe suku Lalisuk, Hermenegildo Lalisuk, orgullu tanba tinan ona komunidade sira iha aldeia rua maioria konsumu de’it bee-posu.

“Projetu ne’e fornese bee ba komunidade aldeia rua, maibé instalasaun ba torneira seidauk másimu, presiza kobre tan bairru seluk, tanba distánsia dook, hosi torneira ne’ebé parte SAS instala ona, ne’ebé ha’u sei konfirma ho sira atubele aumenta tán,” nia orgullu.

Nia fó-sai katak, iha aldeia Manuimpena, bairru Fatusene no aldeia Padiae sentrál, bairru Oésila tinan barak ona konsumu de’it bee-posu, balun hetan perfurasaun maibé konstrui hosi madre Dominika iha Parókia Padiae nian.

“Tinan ne’e mak Governu foin harii perfurasaun ne’e, ne’ebé ha’u hanesan autoridade lokál agradese tanba apoiu ona komunidade sira atubele asesu ona bee-moos ho di’ak,” nia katak.

Entretantu, totál populasaun iha suku Lalisuk hamutuk  3,379, mane 1,698 no feto 1,681, komposta hosi aldeia lima mak hanesan, aldeia Usapibela, Manuimpena, Padiae no aldeia Banoko.

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!