DESPORTU, HEADLINE, INTERNASIONÁL

TL manán tan medalla haat iha ASEAN University Games 2022

TL manán tan medalla haat iha ASEAN University Games 2022

DILI, 08 agostu 2022 (TATOLI)– Atleta Timor-Leste hosi modalidade Atletizmu, Taekwondo no Voleiból konsege rekolla medalla osan mutin ida no osan metan tolu iha ASEAN Unversity Games 2022 iha nasaun Táilandia.

“Ha’u durante kompete iha ASEAN University Games konsege hetan medalla rua mak hanesan osan mutin ida no metan ida. Ha’u sente kontente tebes bele hamorin Timor – Leste nia naran dala ida tan,” Atleta Felisberto hateten ba Agência TATOLI via média sosiál, segunda ne’e.

Notísia relevante: FATL deside atleta Felisberto bá partisipa ASEAN University Games

Medalla osan mutin ne’ebé atleta ne’e hetan tanba sai segundu lugar, hafoin kompete iha kurida metru 5.000 no iha kurida metru 10.000 konsege terseiru lugar no hetan medalla osan metan ida.

Atleta hosi modalidade Taekwondo, Ana da Costa da Silva Pinto Belo, konsege konkista mós medalla osan metan tanba kompete iha klase kilograma 46 hodi halakon atleta seluk hosi nasaun Laos no Malázia.

Entretantu, Modalidade Voleiból Timor-Leste B, ne’ebé reprezenta hosi atleta, José Savio no Tito Miguel kontribui mós medalla osan metan ida bainhira lori ekipa sai terseiru lugar.

Jogu ASEAN University Games ne’e halo entre nasaun hotu ne’ebé hamahan-an iha organizasaun Sudeste Aziátiku (ASEAN) kompostu hosi Timor-Leste, Tailándia, Filipina, Myanmar, Vietname, Cambodia, Laos, Malázia, Singapura, Brunei no Indonézia.

Jogu ne’e sei partisipa direta hosi Universidade hotu iha nasaun ne’ebé halibuar an iha ASEAN. Enkuatu Timor-Leste hetan oportunidade ba modalidade neen mak sei ba partisipa mak hanesan, Atletizmu, Voliból-Praia, Xadres, Taekwondo no Futeból.

Notísia relevante: Aban, atleta nasionál hosi modalidade haat arranka bá Tailándia

Jornalista: Hortencio Sanchez

Editór       : Florencio Miranda Ximenes

iklan
iklan

Leave a Reply

iklan
error: Content is protected !!