EKONOMIA, HEADLINE, MUNISÍPIU, OÉ-CUSSE (RAEOA)

Empreza Irmão Timor hosi Oé-Cusse sai na’in ba ró success

Empreza Irmão Timor hosi Oé-Cusse sai na’in ba ró success

OÉ-CUSSE, 12 agostu 2022 (TATOLI) – Empreza lokál Irmão Timor Unipesoal Lda, hosi Rejiaun Administrativa Espesiál Oé-Cusse Ambeno (RAEOA), sai ona na’in ba ró success, hodi fasilita transporte marítima hosi Oé-Cusse ba Dili no Atauro.

Tán ne’e, iha kinta semana ne’e, Diretór empreza Irmão Timor, realiza enkontru ho Prezidente Autoridade atu informa kona-bá prosesu tomak, inklui prepara halo lansamentu bainhira ró succesu to’o ona portu Mahata.

Julio Mack, hatete, prosesu kona-bá ró success finaliza ona, nune’e nia promete iha fulan-agostu ne’e sei hahú halo viajen hosi nasaun Malázia sei to’o iha Timor-Leste iha setembru tinan ne’e.

“Hanesan setór privadu ohin ami mai koordena ho autoridade RAEOA kona-bá preparasaun atu halo lansamentu iha portu Oé-Cusse, tanba ita sei konvida lia-na’in sira hosi suku 18, membru Govenu ne’ebé relevánsia transporte marrítima nomoos hosi autoridade RAEOA rasik,” Júlio Mack, informa iha Oé-Cusse, kinta ne’e.

Prezidente Autoridade RAEOA, Arsénio Paixão Bano, orgullu tanba empreza Irmão Timor investe iha transporte marítima hodi fasilita povu, nune’e iha futuru sei laiha tán problema kona-bá transporte marítima no aéreu.

“Autoridade prontu iha diskusaun inísiu, autoridade hakarak tama hamutuk, maibé kompañia iha forsa atu mesak, entaun autoridade kontente tanba nia bele la’o mesak, maibé autoridade sei asegura billete 10 ho kuartu ida no karreta ida kada viajen hanesan kontribuisaun hodi fasilita serbisu autoridade nian,” Arsénio Paixão Bano, ko’alia iha Oé-Cusse, sesta ne’e.

Nia afirma, bainhira transporte marítima to’o Oé-Cusse, parte autoridade sei deskuti ho empreza hodi apoia iha parte reseisaun, tanba ne’e fó benefísiu ba povu Oé-Cusse, nune’e nia orgullu tanba Oé-Cusse sei laiha ona problema no izoladu ona kona-bá transporte tantu marítima no aéreu.

“Ha’u hakarak hato’o parabéns ba Irmão Timor, tanba nia halo esforsu atu investe iha transporte marítima, autoridade iha interese boot, tanba ne’e ita reabilita portu Mahata, instala estasaun bee no kombustível, inklui fasilidade seluk atu fasilita,” nia orgullu.

Atu garante ba kombustível, daudaun ne’e autoridade RAEOA halo ona diskusaun ho Timor Gap atu harii estasaun kombustível, nune’e bele fasilita ba transporte aéreu no marítima.

Jornalista: Abílio Elo Nini
Editór: Evaristo Soares Martins

iklan
iklan

Leave a Reply

iklan
error: Content is protected !!