DESPORTU, HEADLINE, MUNISÍPIU, OÉ-CUSSE (RAEOA)

Kopa ZEESM, FC Bene-Ufe hakat ba 8 finál hasoru Fortaleza

Kopa ZEESM, FC Bene-Ufe hakat ba 8 finál hasoru Fortaleza

FC Bene-Ufe hakat ba 8 finál hasoru FC Fortaleza iha semana oin. Imajen Tatoli/ Abílio Elo Nini.

OÉ-CUSSE, 12 agostu 2022 (TATOLI) – Ekipa jogadór hosi klubU FC Bene-Ufe hosi sub-rejiaun Nítibe, hakat ba 8 finál hafoin halakon ekipa FC Santa Izabel iha 16 finál ho rezultadu 3-1 iha kompetisaun Kopa ZEESM iha Rejiaun Administrativa Espesiál Oé-Cusse Ambeno (RAEOA).

Jogu 16 finál ne’e realiza iha kampu futeból Oébau, sub-rejiaun Pante Makasar, iha kinta lokraik ne’e, ekipa FC Bene-Ufe lidera provizoriamente sei hasoru tán ekia FC Fortaleza iha 8 finál ne’ebé sei akontese iha semana oin.

Iha Jogu primeira parte hahú ho menutu 45, ekipa rua lansa kedas kontra-atake ho idak-idak nia tékniku no tátika jogu hodi hetan vitória.

Maibé ekipa jogadór hosi FC Bene-Ufe hatudu jogu kalma no estratéjiku, tanba iha primeira parte ne’e, jogu foin to’o menutu 10, jogadór Tarcisio Siku, númeru kamizola 7 lansa dahuluk golu ida.

Rezultadu ne’e lori sorti di’ak ba ekipa Bene-Ufe tanba jogu liu de’it menutu 15, to’o menutu 25, jogadór Tarcisio Siku lansa tán golu daruak hodi hatuur rezultadu 2-0.

Ho rezultadu ne’e halo ekipa jogadór FC Santa Izabél revolta fali ho esforsu tomak, jogu kontinua to’o menutu 32, hetan oportunidade liuhosi penalidade, maibé guarda FC Bene-Ufe konsege salva bola.

Jogu kontinua la’o ekipa FC Santa Izabél esforsu atu gaña golu ruma, maibé laiha rezultadu, to’o termina jogu primeira parte iha menutu 45 nia laran, ekipa FC Bene-Ufe lidera provizória ho rezultadu 2-0.

Hafoin intervallu durante menutu 15, hakat fali ba jogu segunda parte, tempu hanesan menutu 45, ekipa FC Bene-Ufe kontinua domina no nafatin hatudu vontade di’ak tanba maioria domina kampu no hatudu tátika ne’ebé furak.

Ho vontade ne’e jogu segunda parte la’o to’o menutu 10, jogadór Tarcisio Siku, lansa tán golu ba dala tolu, hodi muda rezultadu sa’e ba 3-0.

Ho rezultadu ne’e ekipa FC Santa Izabel, hatudu fali estratéjia foun hodi troka jogadór sira, estratéjia foun ne’e iha duni rezultadu, tanba jogu to’o menutu 23, jogadór Denis Nunes, númeru kamizola 10 lansa golu ida, hodi hatuur rezultadu 3-1.

Rezultadu ne’e halo jogu kontinu rame liután, ekipa idak-idak hatudu jogu furak maibé laiha mudansa ba rezultadu to’o termina tempu.

Nune’e jogu segunda parte to’o kompleta menutu 90, FC Bene-Ufe lidera provizóri ho rezultadu 3-1 hodi hakat ba 8 finál, no tuir kalendáriu FC Bene-Ufe sei hasoru ekipa hosi FC Fortaleza iha jogu 8 finál iha semana oin.

Maske derrota, maibé treinadór hosi ekipa jogadór FC Santa Izabel, Miguel Sipa, rekoñese ekipa derrota tanba jagadór sira ladún iha unidade durante jogu iha kampu laran.

“Ami lakon, tanba ekipa ladún unidade iha kampu, ita haree forsa hanesan maibé idak-idak iha ambisaun atu lansa golu, entaun ida-ne’e fó oportunidade ba ekipa FC Bene-Ufe domina liu bola, no rezultadu ita haree ami lakon, maibé ita agradese tanba kjogu la’o di’ak to’o remata ho susesu,” nia orgullu.

Durante jogu ho durasaun menutu 90 ne’e, lidera hosi árbitru Rodrigo Teixeira, asistente dahuluk, Bendito da Conceição, no asistente daruak João Bosco Auni.

Jornalista   : Abílio Elo Nini
Editór         : Evaristo Soares Martins

iklan
iklan

Leave a Reply

iklan
error: Content is protected !!