EKONOMIA, HEADLINE, MUNISÍPIU, OÉ-CUSSE (RAEOA)

Vise-Ministru Finansa koordena Autoridade RAEOA observa serbisu aduaneira iha fronteira

Vise-Ministru Finansa koordena Autoridade RAEOA observa serbisu aduaneira iha fronteira

OÉ-CUSSE, 12 agostu 2022 (TATOLI) – Vise-Ministru Finansa (MF), António Freitas, sei halo observasaun ba serbisu Autoridade Aduneiru (Alfándega/AA) iha fronteira sira iha Rejiaun Administrativa Espesiál Oé-Cusse Ambeno (RAEOA).

Molok hala’o vizita ofisiál ba fronteira, Governante ne’e realiza enkontru kortezia ho Autoridade RAEOA ne’ebé lidera hosi Prezidenti Autoridade, Arsénio Paixão Bano iha Gabinete ZEESM Oé-Cusse, sesta ne’e.

“Objetivu hosi vizita ne’e atu mai konsulta nomoos koordena ho autoridade RAEOA liu-liu kona-bá dezenvolvimentu iha área fronteira, liga ho servisu alfándega, no haree besikliu tán evolusaun hosi zona espesiál Oé-Cusse, nune’e iha futuru saida mak Governu Sentrál liuhosi Ministériu Finansa bele fó tulun,” Vise-Ministru Finansa, António Freitas, informa ba jornalista sira hafoin remata enkontru iha Gabinete ZEESM Oé-Cusse.

Aliende halo halo observasaun ba serbisu autoridade Aduaneiru sira, sei halo vizita mós ba infraestrutura sira ne’ebé ezekuta hodi autoridade RAEOA, tanba ne’e gasta osan Estadu nian, maibé haree hosi jestaun autoridade katak tinan ne’e hahú estrada nasionál rua ba sub-rejiaun sira.

“Ohin, ha’u rona esplikasaun barak kona-ba jestaun ba infraestrtura sira iha Oé-Cusse sai esperiénsia mai ami, entaun ohin ha’u promete sei haruka fali ekipa hosi jestaun mobilizasuan rekursu esternu liga ho empréstimu ba parseiru setór públiku no privadu, atubele mai aprende iha RAEOA, kona-bá desizaun ne’ebé autoridade foti,” nia afirma.

Iha enkontru kortezia ne’e, Prezidente Autoridade RAEOA, Arsénio Paixão Bano, agradese nia parte sei koloka membru autoridade sira atu akompaña membru Governu ne’e, atu halo observasaun ba infraestrutura iha sub-rejiaun haat.

Jornalista: Abílio Elo Nini
Editór: Evaristo Soares Martins

iklan
iklan

Leave a Reply

iklan
error: Content is protected !!