DESPORTU, HEADLINE, MUNISÍPIU, OÉ-CUSSE (RAEOA)

FC Amor Oébau ‘dere’ FC Baqui Sentrál 2-1 iha 8 finál

FC Amor Oébau ‘dere’ FC Baqui Sentrál 2-1 iha 8 finál

OÉ-CUSSE, 15 agostu 2022 (TATOLI) – Ekipa jogadór hosi klubu FC Amor Oébau A halakon FC Baqui Sentrál ho rezultadu 2-1 iha jogu 8 finál eventu Kopa ZEESM iha Rejiaun Administrativa Espesiál Oé-Cusse Ambeno (RAEOA).

Jogu 8 finál ne’e realiza iha kampu futeból Oébau, sub-rejiaun Pante Makasar iha segunda lokraik ne’e, ekipa FC Amor Oébau A lidera provizoriamente hakat ba jogu iha 4 finál sei hasoru ekipa entre FC Bene-Ufe ho FC Fortaleza sei jogu iha tersa 16, agostu semana ne’e.

Jogu 8 finál ne’e hahú iha primeira parte ho menutu 45, ekipa rua lansa kedas kontra-atake ba malu ho idak-idak nia tékniku no tátika jogu hodi hetan vitória.

Maibé jogu iha primeira parte ekipa FC Amor Oébau A hatudu forsa no domina liu bola iha kampu laran, hodi halo ekipa FC Baqui Sentrál lakon iha jogu primeira parte.

Tanba jogu foin la’o to’o menutu 20, jogadór Etelino Pereira, númeru kamizola 12 lansa golu dahuluk hodi hatuur rezultadu 1-0.

Rezultadu ne’e lori sorte di’ak ba ekipa FC Amor Oébau A, komesa hatudu jogu furak liután, tanba jogu liu de’it menutu 5, iha menutu 25 jogadór Oscar Talan, númeru kamizola 9 lansa tán golu daruak, hodi muda rezultadu sa’e ba 2-0.

Jogu primeira parte kontinua la’o ekipa FC Baqui Sentrál esforsu aan nafatin maibé la konsege, to’o jogu segunda parte termina ho menutu 45, ekipa FC Amor Oébau A, lidera provizória ho rezultadu 2-0.

Hafoin intervalu durante menutu 15, jogu kontinua hikas ba segunda parte ho tempu hanesan menutu 45, ekipa FC Amor Oébau A kontinua domina jogu iha kampu laran no nafatin hatudu vontade di’ak tanba maioria domina kampu no hatudu tátika ne’ebé furak.

Maibé ekipa FC Baqui Sentrál jogu ho kalma no komesa hatudu fali estratéjia foun hodi troka jogadór sira.

Nune’e ho estratéjia foun ne’e iha duni rezultadu, tanba jogu segunda parte la’o to’o menutu 28, jogadór Jorge Abi, númeru kamizola 7 lansa golu ida hodi hatuur rezultadu 1-2.

FC Amor Oébau A senti ameasadu, treinadór deside komesa troka jogadór sira, estratéjia ne’e iha duni rezultadu, tanba ekipa FC Bakui Sentrál la halo ona revolta ba guarda FC Amor Oébau A, tanba defeza metin.

Jogu segunda parte kontinua rame liután, tanba ekipa idak-idak hatudu jogu furak atu gaña golu ruma maibé laiha mudansa ba rezultadu to’o termina jogu segunda parte ho rezultadu 2-1.

Maibé ekipa FC Amór Oébau A, mantein pozisaun ho rezultadu 2-1, to’o jogu segunda parte termina, ekipa FC Amór Oébau A lidera provizória hodi hakat ba 4 finál iha eventu Kopa ZEESM 2022 nian.

Nune’e, treinadór ekipa FC Baqui Sentrál , Camilo Saet Nono, rekoñese lakon tanba tanba falla iha avansadu, maibé parte lamenta ho desizaun arbitru iha durante jogu tanba dalaruma menus koñesimentu iha regulamentu sira.

“Jogu iha lakon iha manán, ami lakon tanba falla iha striker ladún serbisu hamutuk tan ne’e mak ami lakon, maibé ohin ita haree arbitru mós dalaruma kria konfuzauan ba jogadór sira, tanba ladún iha koñesimentu ba regra sira, bola mate ka fala ita hakilár mak foin hú, maibé labuat ida, ita espera iha futuru sei bele fasilita formasaun ba arbitru sira, se lae problema iha kampu tanba arbitru,” nia katak.

Treinadór ekipa FC Amor Oébau A, Octaviano Kofitalan, orgullu ba jogadór sira tanba hatudu jogu kualidade liuhosi serbisu hamutuk, mak lori klubu FC Amor Oébau hakat ba 4 finál

“Ami manán maibé manán ho sorte de’it, tanba rezultadu duni malu hela, maibé hanesan treinadór agradese ba jogadór sira tanba hatudu jogu furak, unidade no serbisu hamutuk iha kampu, ida-ne’e mak xave ohin ami ultrapasa ba jogu iha faze 4 finál,” nia orgullu.

Entretantu, durante jogu hahú hosi primeira no segunda parte ho durasaun menutu 90, lidera hosi arbitru, Rui Manuel da Costa, asistente dahuluk Bendito da Conceição, no asistente daruak Rodrigo Teixeira.

Jornalista: Abílio Elo Nini
Editór: Evaristo Soares Martins

iklan
iklan

Leave a Reply

iklan
error: Content is protected !!