KRAM Oé-Cusse dezloka kandidatu PSHT na’in-83 tuir graduasaun iha Dili
OÉ-CUSSE, 16 agostu 2022 (TATOLI) – Sub-Komisaun Reguladora Arte-Marsiál (Sub-KRAM), hosi Rejiaun Administrativa Espesiál Oé-Cusse Ambeno (RAEOA), tersa ne’e dezloka kandidatu organizasaun Persaudaraan Setia Hati Terate (PSHT) hamutuk na’in-83 hodi tuir serimónia graduasaun sa’e sintu iha munisípiu Dili.
“Ohin dadeer ita halo ona serimónia ba kandidatu 83 hosi organizasaun PSHT, atu tuir graduasaun sa’e sintu iha Dili, tanba graduasaun ne’e sei akontese iha loron kinta 18 agostu, entaun Oé-Cusse ohin sira dezloka ona,” Prezidente sub-KRAM Oé-Cusse, Zeferino da Cruz Salu, ko’alia iha Oé-Cusse.
Nia afirma, Organizasaun PSHT kumpri ona rekizitu rezolusaun Governu nian, hanesan programa atu reintegra fila-fali komunidade sira-ne’ebé envolve-aan iha organizasaun hotu atu treina livre, maibé iha lei atu regulariza sira tuir lei nú. 5/2017 hodi kumpri tuir doutrina ne’e prevista ona iha estatutu organizasaun nian.
Nu’udar responsável másimu ba grupu arte-marsiál, orgullu tanba juventude iha Oé-Cusse, kuda metin moto Atoni-oan nian, katak unidade asaun progresu, hamutuk serbisu hodi dezenvolve Timor-Leste, no espesiál Oé-Cusse Ambeno.
“Ida-ne’e hatudu katak, ita serbisu hamutuk la’os organizasaun ida de’it maibé hosi Governu hosi autoridade RAEOA no parte sosiedade no autoridade komunitáriu, PNTL inklui komunidade, ita serbisu hamutuk maka ita fó valór ohin loron katak, problema artemarsiál iha Oé-Cusse no eskala mihis,” nia afirma.
Nia apela nafatin ba grupu arte-marsiál iha RAEOA, kontinua promove dame pás no estabilidade, tanba daudaun KRAM Oé-Cusse kontinua akompaña hosi nivel nasionál kona-bá atividade treina livre.
Koordenadór organizasaun PSHT Oé-Cusse, Candido dos Reis Amarál, agradese ba serbisu sub-KRAM RAEOA, tanba durante ne’e fasilita morál, hodi reintegra hikas PSHT atu treina livre.
“Ohin sub-KRAM ho PNTL mai husik hela kandidatu sira hamutuk 83 ba Dili hodi tuir graduasaun sa’e sintu, ne’e atu hatudu katak PSHT prontu atu serbisu ho ema hotu ho orgaun Estadu, organizasaun PSHT iha komitmentu boot atu kuidadu Estadu ne’e ho kontribuisaun ba páz no dame,” nia orgullu.
Purtantu, iha 26 abríl 2022 ne’e Governu liuhosi Sekretaria Estadu Juventude no Desportu (SEJD), aprova ona legalidade ba artemarsiál tolu, IKS, PSHT no KORK no públika ona iha jornál repúblika atubele halo treinu livre no sa’e sintu iha rai laran.
Bazea rezolusaun Governu númeru 14/2020, 2 marsu, ne’ebé revoga tiha rezolusaun númeru 16/2013 hodi fó informasaun ba grupu arte-marsiál tolu ne’e, presiza kumpre kritériu ne’ebé rejista hamutuk pontu 18.
Nune’e iha 31 jullu 2021, organizasaun PSHT kompleta ona rekizitu hosi Komisaun Reguladora Arte Marsiál, no rejistu ona iha Ministériu Justisa (MJ) liuhosi Diresaun Nasionál Notariadu, no iha direitu hala’o atividade legál iha Timor-Leste.
Tuir dadus ne’ebé sub-KRAM Oé-Cusse rejista, hamutuk organizasaun hitu (7) maka eziste iha Oé-Cusse ho totál membru hamutuk 1.800-resin, hanesan PSHT, IKS, PD, KORKA, Taekwondo, Karatedo no Boxin.
Notísia relevante: PSHT kompleta ona rekezitu hosi KRAM
Jornalista: Abílio Elo Nini
Editór: Evaristo Soares Martins
