FC Sibuki hakat ba finál hafoin halakon FC São Rocky Banoko ho rezultadu 2-0
OÉ-CUSSE, 18 agostu 2022 (TATOLI) –Ekipa jogadór hosi klubu FC Sibuki, hakat ba finál hafoin halakon ekipa FC São Rocky Banoko, iha jogu 4 finál ho rezultadu 2-0 iha eventu Kopa ZEESM iha Rejiaun Administrativa Espesiál Oé-Cusse Ambeno (RAEOA).
Jogu 4 finál ne’e realiza iha kampu futeból Oébau, sub-rejiaun Pante Makasar, iha kinta lokraik ne’e.
ekipa Sibuki lidera provizóriamente tama finál hodi jogu iha sesta 19 agostu entre FC Amor Oébau ho FC Fortaleza, no ekipa FC São Rocky Banoko, sei hadau terseiru lugár iha jogu tuir mai.
Jogu 4 finál ne’e hahú iha primeira parte ho menutu 45, ekipa rua lansa kedas kontra-atake ba malu ho idak-idak nia tékniku no tátika jogu hodi hetan vitória, maibé iha primeira parte ekipa rua hatudu forsa hanesan ho rezultadu 0-0.
Hafoin intervalu durante menutu 15, jogu kontinua hikas ba segunda parte ho tempu hanesan menutu 45, ekipa rua halo revolta ba malu no lansa beibeik ameasa ba guarda-rede maibé la rezulta golu ruma.
Nune’e jogu iha segunda parte kontinua to’o menutu 90, ekipa rua hatudu forsa hanesan ho rezultadu 0-0
Tanba jogu durante menutu 90, ekipa rua la konsege prodús golu, entaun árbitru lori tán ekipa rua ne’e ba extra time ho menutu 30, kada menutu 15 troka fatin hodi buka vensedór iha jogu 4 finál hodi prepara jogu finál nian.
Iha primeira parte menutu 15, FC Sibuki hatudu kedan vontade di’ak tanba maioria domina kampu no hatudu tátika ne’ebé furak.
Ho vontade ne’e jogu segunda parte la’o to’o menutu 10, jogadór Carlito Eko, númeru kamizola 7 lansa golu ida liuhosi penalidade hodi hatuur rezultadu 1-0.
Rezultadu ne’e halo ekipa FC Sào Rocky Banoko hatudu fali estratéjia foun hodi troka jogadór sira iha menutu 13, estratéjia hatudu duni ameasa iha menutu 9, lansa hosi avansadu António Asqueli ho númeru kamizola 9 maibé lakonsege tanba guarda FC Sibuki metin.
Nune’e iha jogu menutu 15 ba extra time ekipa FC Sibuki lidera provizória ho rezultadu 1-0.
Hakat fali jogu segunda parte ho tempu menutu 15, jogu kontinua rame liután, tanba ekipa idak-idak hatudu jogu furak atu gaña golu ruma.
Maibé FC Sibuki hatudu jogu kalma, nune’e jogu iha segunda parte ekipa FC Sibuki hatudu jogu furak tanba duir bola ho kalma no estratéjiku, to’o menutu 10, jogadór, Octaviano Nono númeru kamizola 19 lansa tán golu ida hodi muda rezultadu sa’e ba 2-0.
Nune’e iha jogu segunda parte ne’e, to’o termina ho tempu menutu 120, ekipa FC Sibuki lidera ho rezultadu 2-0, hodi hakat ba finál, hodi hein ekipa FC Amor Oébau ho Fortaleza sei joga sesta 19 agostu ne’e.
Nune’e, treinadór ekipa FC Sibuki, Camilo Saet Nono, orgullu ba no agradese ba ekipa tanba hatudu jogu furak hodi susesu hakat ba finál.
“Ha’u hanesan treinadór agradese ba ha’u-nia ekipa tanba hatudu jogu di’ak iha lokraik ne’e, nune’e ha’u sei lidera ekipa hodi kontinua prepara-aan liuhosi treinu nune’e iha jogu finál sei nafatin hatudu jogu di’ak,” nia hateten.
Entretantu, durante jogu hahú hosi primeira no segunda parte to’o aumenta tán extra time ho durasaun menutu 120, lidera hosi árbitru, Rui Manuel da Costa, asistente dahuluk, Bendito da Conceição, no asistente daruak, João Bosco Auni.
Jornalista: Abílio Elo Nini
Editór: Evaristo Soares Martins
