iklan

EKONOMIA, HEADLINE, MUNISÍPIU, OÉ-CUSSE (RAEOA)

Grupu Hailomaila iha Pante Makasar rekolla $2.500 liuhosi fa’an modo

Grupu Hailomaila iha Pante Makasar rekolla $2.500 liuhosi fa’an modo

Xefe grupu ortikultura Hailomaila, esplika hela atividade grupu ba Sekretáriu Rejional ba Asuntu Agrikultura. Imajen mídia Sekretáriu Rejionál Agrikultura.

OÉ-CUSSE, 18 agostu 2022 (TATOLI) – Grupu ortikultura Hailomaila hosi aldeia Manuimpena, suku Lalisuk, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA) rekolla ona osan hamutuk $2.500 durante fulan tolu nia laran liuhosi fa’an modo.

Sekretáriu Rejionál ba Asuntu Agrikultura, José Eta, informa, durante grupu Hailomaila hala’o atividade ne’e, hetan apoia téknika no fini hosi Autoridade RAEOA serbisu hamutuk ho parseiru internasionál United Nations Development Programme (UNDP).

Nune’e apoia ne’ebé fornese mak hanesan, instala bee-moos ba grupu ortikultura inklui ekipamentu, no hetan asisténsia tékniku inklui fini, hodi dezenvolve atividade ortikuktura kuda tomati, brinjela, alfasi, repollu, modo-mutin no hakiak manu.

“Bainhira autoridade fornese apoiu, entaun presiza mai halo observasaun ba atividade sira iha rezultadu oinsá, nune’e iha futuru ita bele fasilita grupu agrikultura sira oinsá, bele dezevolve di’ak liután atividade ne’ebé grupu sira hala’o, tanba autoridade nia polítika ida mak tenke investe ba agrikultura, hanesan preparasaun iha futuru bele redús ona produtu importasaun,” José Eta, ko’alia iha Oé-Cusse, kinta ne’e.

José Eta agradese ba inisiativa grupu Hailomaila, tanba serbisu ekipa ho unidade konsege hetan rendimentu, tán ne’e nia apela ba grupu sira atu kontinua mellora atividade ortikultura, tanba autoridade ho parseiru sei kontinua tau matan liuhosi apoia.

Xefe grupu Hailomaila, Iria Texeira, agradese ba autoridade ho parseiru sira bele vizita sira hosi enkoraja atu hasa’e tán kuantidade produtu iha grupu ortikultura nian.

“Iha ami-nia Grupu Hailomaila hamutuk ema na’in 15 no hosi ami-nia produtu hirak-ne’e konsege hetan ona osan ho totál $ 2.500 durante fulan tolu nia laran, tán ne’e ohin mai vizita, ami husu ba nafatin ba autoridade RAEOA ho UNDP atu nafatin fasilita ami kona-ba tékniku atu nune’e mellora tán ami-nia produtu hirak-ne’e” nia sujere.

Jornalista   : Abílio Elo Nini
Editór           : Evaristo Soares Martins

iklan
iklan

Leave a Reply

iklan
error: Content is protected !!