Autoridade komunitária no komunidade sei koopera kontribui ba projetu estrada Nítibe
OÉ-CUSSE, 19 agostu 2022 (TATOLI) – Autoridade komunitária no komunidade sira iha suku Lifau, Taiboko sub-rejiaun Pante Makasar, no suku Suni-ufe, sub-rejiaun Nítibe, sei koopera ho autoridade Rejiaun Administrativa Espesiál Oé-Cusse Ambeno (RAEOA) hodi kontribui iha implementasaun dezenvolvimentu estrada nasionál Nítibe.
Xefe suku Lifau, Lazaro Kenat, reprezenta komunidade Lifau agradese ba autoridade RAEOA tanba tinan ne’e hahú reabilita estrada hosi sub-rejiaun Pante Makasar liga ba sub-rejiaun Nítibe, nune’e futuru fasilita komunidade atu asesu ba merkadu.
“Koba-bá projetu ne’e ami apoiu, ne’e komunidade mós sei la impede projetu ne’e bainhira afeta ba patrimóniu ruma hanesan rai no plantasaun, maibé kuandu sira husu kona-ba direitu, ha’u hanesan xefe suku sei la impede mós tanba ne’e nia direitu, maibé atu impede ka taka projetu ne’e, ha’u sei halo intervensaun, tán ne’e fó duni benefísiu ba ami-nia suku atu asesu ba merkadu,” Lazaro Kenat, ko’alia hafoin serimónia lansamentu hatuur fatuk dahuluk iha aldeia Tulaika, sesta ne’e.
Xefe suku Taiboko, Joaquin Tafin, agradese ba Autoridade RAEOA tanba tinan ne’e hahú halo estrada foun ba sira suku suku hodi fasilita sirkulasaun transporte no komunidade atu asesu ho di’ak.
“Ami sente orgullu Guvernu hahú lori dezenvolvimentu mai iha suku, ami hanesan lideransa lokál agradese orgullu ho dezenvolvimentu ne’e, ami espera sei serbisu hamutuk ho empreza nune’e projetu ne’e bele la’o-tuir kontratu nian katak sei remata iha tinan rua nia laran, nune’e bele implementa tán dezenvolvimentu to’o Citrana fronteira Naktuka,” nia orgullu.
Nia fó-sai katak, komunidade afetadu iha suku Taiboko, halo ona levantamentu dadus hosi servisu terra propriedade no diresaun agrikultura rejionál, kona-bá afeta ba plantasaun no rai, nune’e iha futuru nia parte sei propoin no kolabora hodi komunidade atu labele impede prosesu dezenvolvimentu iha suku.
Xefe suku Suni-Ufe, sub-rejiaun Nítibe, reprezenta komunidade agradese ba Autoridade RAEOA, tanba tinan barak komunidade pertense Nítibe susar tebes atu asesu estrada, maibé tinan ne’e iha inisiativa hakarak lori projetu hanesan iha Pante Makasar atu implementa iha sub-rejiaun Nítibe.
“Foin daudaun ami enkontru koordenasaun ho empreza, atu envolve mós ita nia traballadór hosi suku rasik, liuliu ba suku tolu, Lifau, Taiboko no Suni-Ufe, tanba projetu ne’e mai iha suku ne’e, entaun presiza envolve ita-nia komunidade,” nia katak.
Kona-bá afetasaun hosi mega projetu ne’e, nia parte koordena ona ho komunidade atu kontribui iha prosesu dezenvolvimentu ne’e, hanesan kona rai metru ida ka rua, ho ai númeru kiik, presiza oferese ba Estadu, tanba Estadu durante ne’e oferese ona dezenvolvimentu ba iha suku to’o aldeia, no nia benefísiu komunidade maka sei uza.
Entretantu, distánsia konstrusaun estrada nasionál ne’e hamutuk kilómetru 16, hahú hosi ponte Noefafan suku Lifau, envolve suku Taiboko to’o Oénunu, suku Suni-Ufe.
Nune’e projetu ne’e ezekuta hosi empreza internasionál PT. Waskita Karya, ho valór kontratu millaun $23, ne’ebé autoridade RAEOA prevee hosi Orsamentu Jerál Estadu (OJE) 2022 ho durasaun serbisu durante fulan 18.
Jornalista: Abílio Elo Nini
Editór: Evaristo Soares Martins
