iklan

DESPORTU, HEADLINE, MUNISÍPIU, OÉ-CUSSE (RAEOA)

Kopa ZEESM époka 2022, FC Amor Oébau hasoru FC Sibuki iha finál

Kopa ZEESM époka 2022, FC Amor Oébau hasoru FC Sibuki iha finál

OÉ-CUSSE, 19 agostu 2022 (TATOLI) – Ekipa jogadór hosi klubu FC Amor Oébau sei hadoru FC Sibuki hafoin  halakon FC Fortaleza ho rezultadu 2-1 iha jogu 4 finál, iha eventu Kopa ZEESM, Rejiaun Administrativa Espesiál Oé-Cusse Ambeno (RAEOA).

Eventu Kopa ZEESM, ba jogu 4 finál ne’e entre ekipa FC Fortaleza ho ekipa FC Amór Oébau realiza iha kampu futeból Oébau, sub-rejiaun Pante Makasar iha sesta lokraik ne’e.

Jogu 4 finál ne’e hahú iha primeira parte ho menutu 45, ekipa rua hatudu kedas kontra-atake ba malu ho idak-idak nia tékniku no tátika jogu hodi hetan vitória.

Maibé teki-teki iha menutu 15, ekipa FC Fortaleza lansa uluk golu ida liuhosi jogadór, Matias Nisfo, númeru kamizola 9 hodi hatuur rezultadu 1-0.

Nune’e jogu kontinua la’o, ekipa FC Amor Oébau hahú hatudu fali jogu furak, pasa bola ho kalma hodi revolta fali iha menutu 29, jogadór Etelino Pereira, númeru kamizola 12 lansa golu ida hodi hatuur rezultadu hanesan 1-1.

Maske FC Fortaleza esforsu-aan nafatin, liuhosi avansadu Matias Nisfo, lansa beibeik ameasa ba guarda FC Fortaleza maibé lakonsege rezulta golu ruma, tanba guarda-rede metin.

Nune’e jogu iha primeira parte to’o termina iha menutu 45, ekipa FC rua hatuur rezultadu hanesan 1-1.

Hafoin intervalu durante menutu 15, jogu kontinua hikas ba segunda parte ho tempu hanesan menutu 45, ekipa FC Amor Oébau kontinua domina jogu iha kampu laran no nafatin hatudu vontade di’ak tanba maioria domina kampu no hatudu tátika ne’ebé furak.

Ho vontade ne’e lori sorti di’ak ba FC Amor Oébau tanba foin komesa menutu 1, Jogadór Alarico Mota, númeru kamizola 11 lansa golu liuhosi penalidade hosi hatuur rezultadu 2-1.

Nune’e ekipa FC Fortaleza lakohi simu golu ne’e tanba, konsidera árbitru mak hú sala, maibé desizaun árbitru nafatin bola falta no konsidera penalidade, nune’e ekipa FC Fortaleza deside hodi retira hosi kampu, no lakohi kontinua jogu to’o remata.

“Ami la joga ona, husik árbitru mak joga mesak, bola tuir loloos la falta ida,” kapitaun FC Fortaleza, Aten, ko’alia iha kampu futeból Oébau.

Tanba ekipa FC Fortaleza retira ona hosi kampu, árbitru sira deside termina jogu iha jogu segudan parte ho menutu 1.

Nune’e ekipa FC Amor Oébau manán ho rezultadu 2-1, no hakat ba jogu finál sei hasoru ekipa FC Sibuki sei joga iha semana oin.

Treinadór ekipa FC Amor Oébau, Octaviano Kofitalan, rekoñese manán maske jogu la remata, maibé nu’udar jogadór no ekipa tenke submete ba regulamentu sira-ne’ebé komisaun organizadora sira estabelese ona.

“Tuir loloos jogu iha prosesu nia laran, tanba rezultadu foin 2-1, agora tempu sei iha hela menutu 44, entaun sei oportunidade, maibé karik sira deside hanesan ne’e, ne’e desizaun hosi árbitru iha labele kontra,” nia afirma.

Entretantu, durante jogu hahú hosi primeira no segunda parte ho durasaun menutu 46, lidera hosi árbitru, Arlindo Soares, asistente dahuluk, João Bosco Auni, no asistente daruak, Rui Manuel da Costa.

Jornalista: Abílio Elo Nini
Editór: Evaristo Soares Martins

iklan
iklan

Leave a Reply

iklan
error: Content is protected !!