OÉ-CUSSE, 22 agostu 2022 (TATOLI) – Asosisasaun Futeból Oé-Cusse (AFO) iha Rejiaun Administrativa Espesiál Oé-Cusse Ambeno (RAEOA), ajenda ona kaléndariu ba realizasaun turneiu futeból juveníl ba mane sub-16 no feto sub-35 sei halo abertura iha 26 agostu tinan ne’e
Vise-Prezidente Asosisasaun Futeból Oé-Cusse (AFO), RAEOA, Julio Coel, informa, objetivu hosi tuneiru ne’e atu promove talentu juvenil sira iha Oé-Cusse ba futuru desportiva, tanba atividade ne’e nu’udar programa ajenda prioridade hosi Federasaun Futeból Timor-Leste (FFTL).
“Programa ida-ne’e la’o tanba durante tinan hira ona AFO fasilita ona formasaun ba juvenil-sira, tan ne’e mak AFO planeia atu halo kompetisaun, atu promove alin sira-nia talentu nu’udar fini ba modalidade futeból iha Oé-Cusse,” Vise-Prezidente AFO, Julio Coel, ko’alia iha edifísiu AFO Oé-Cusse, segunda ne’e.
Nia informa, turneiu ne’e loloos realiza ona iha fulan-jullu, maibé la konsege tanba Kopa ZEESM sei la’o hela, maibé bainhira hotu ona mak sei kontinua kedas, tan ne’e tuir planu sei abertura iha 26 agostu tinan ne’e, tanba hetan apoiu mai hosi Federasaun Futeból Timor-Leste.
“Kompetisaun ba sub-16 mane no sub-35 ba feto realiza tanba hetan fundu hosi FFTL hamutuk rihun $2,500, ho objetivu atu promove oan-sira ne’ebé iha talentu ba modalidade futeból, tanba AFO daudaun hala’o ona formasaun ba juvenil-sira iha kampu futeból rua, ida iha Padiae, suku Lalisuk ida iha kampu futeból Oébau, suku Costa sub-rejiaun Pante Makasar, no sai programa prioridade ba FFTL nian iha Oé-Cusse kada tinan atu realiza,” nia afirma.
Nia fó-sai katak, fundu ne’ebé durante ne’e AFO iha, hetan subsídiu másimu mai hosi hosi FFDTL hahú kedas iha 2019, kada fulan prevee rihun $1, maibé iha abríl, aumenta sa’e ba rihun $1,500, entaun fundu ne’ebé AFO hetan, 30% uza ba administrasaun no 70% uza ba atividade desportu ba kompetisaun.
Totál rejistrasaun atu partisipa iha turneiu AFO ne’e mai hosi mane sub-16 iha klubu 13 no feto sub-35 iha klubu 6.
Jornalista : Abílio Elo Nini
Editór : Evaristo Soares Martins
