FC Sebuki sai kampiaun Kopa ZEESM époka 2022

OÉ-CUSSE, 22 agostu 2022 (TATOLI) – Ekipa jogadór hosi klubu FC Sebuki sai kampiaun ba modalidade futeból iha eventu Kopa ZEESM époka 2022 iha Rejiaun Administrativa Espesiál Oé-Cusse Ambeno (RAEOA).

Jogu finál ne’e realiza iha kampu futeból Oébau, sub-rejiaun Pante Makasar iha segunda lokraik ne’e, ekipa FC Sebuki sai kampiaun ba eventu Kopa ZEESM époka 2022 hafoin halakon ekipa FC Amor Oébau iha jogu finál ho rezultadu 1-0.

Jogu finál ba Kopa ZEESM époka 2022 ne’e, kada klubu mai ho adeptu kuaze rihun ba rihun mak partisipa, hodi fó apoia ba ekipa idak-idak nia klubu, tanba nu’udar jogu ikus atu hadau kampionatu ba taxa Kopa ZEESM tinan ne’e.

Jogu finál ne’e hahú iha primeira parte ho menutu 45, ekipa rua lansa kedas kontra-atake ba malu tuir idak-idak nia tékniku no tátika jogu hodi hetan vitória iha eventu ne’e.

Maibé jogu iha primeira parte ne’e, ekipa rua hatudu forsa hanesan iha kampu laran, maske idak-idak esforsu tuir tátika no tékniku idak-idak nian, lansa ameasa ba guarda-rede maibé laiha rezultadu golu ruma, iha jogu primeira parte ne’e.

Nune’e jogu iha primeira parte la’o to’o termina ho menutu 45, ekipa rua hatuur forsa hanesan 0-0.

Hafoin intervalu durante menutu 15, jogu kontinua hikas ba segunda parte ho tempu hanesan menutu 45, ekipa FC Amór Oébau domina bola iha kampu laran no hatudu vontade di’ak tanba maioria domina kampu, maibé laiha sorte atu gaña golu ruma.

Maibé ekipa FC Sebuki jogu ho kalma no komesa hatudu fali estratéjia foun hodi pasa bola ho tátika ne’ebé furak, nune’e ho estratéjia foun ne’e iha duni rezultadu, tanba jogu segunda parte la’o to’o menutu 28, avansadu, Melquiano Oqui númeru kamizola 10, ameasa guarda FC Amor Oébau maibé lakonsege tanba guarda konsege salva bola.

Ho ameasa ne’e jogu segunda parte kontinua rame liután, tanba ekipa ida-idak hatudu jogu furak atu gaña golu ruma maibé laiha mudansa ba rezultadu to’o termina jogu ho menutu 45 iha segunda parte, ekipa rua hatudu forsa hanesan ho rezultadu hanesan 0-0.

Tanba ekipa rua seidauk iha rezultadu iha jogu finál ne’e, árbitru sira lori tán ekipa rua ne’e ba extra time jogu menutu 30, kada menutu 15 troka guarda.

Tama ba jogu extra time iha primeira parte menutu 15, lori sorte di’ak ba ekipa FC Sebuki, tanba jogu la’o to’o menutu 7, avansadu, Adrinalo Eko, númeru kamizola 77 lansa golu dahuluk, liuhosi tebe kantu konsege tama liu ba guarda, hodi fó vitoria foun ba ekipa FC Sebuki ho rezultadu 1-0.

Ho rezultadu ne’e halo ekipa FC Amor Oébau, revolta fali iha menutu 13, liuhosi jogadór, Etelino Pereira, númeru kamizola 12, fó kabesa ba guarda-rede maibé la konsege rezulta golu ruma, tanba guarda Sebuki metin.

Ho ameasa ne’e halo adeptu sira, hakilar maka’as liután hodi fó vontade ba ekipa FC Amor Oébau, atu kontinua esforsu maka’as hodi hatuur rezultadu hanesan, maibé esforsu ne’e la konsege tanba ekipa FC Sebuki mak sorti liu.

Nune’e jogu kontinua to’o termina ho menutu 15 iha primeira parte, ekipa FC Sebuki, lidera provzória ho rezultadu 1-0.

Hakat fali ba extra time segunda parte tempu hanesan menutu 15, ekipa FC Sebuki, mantein domina bola iha kampu no hatudu tátika ne’ebé furak, ho tátika ne’e, iha menutu 5, avansadu, Melquiano Oqui, númeru kamizola 10, lansa amesa ba guarda FC Amor Oébau, maibé lakonsege, tanba guarda salva tiha.

Hafoin jogu remata, treinadór ekipa FC Amor Oébau, Octaviano Kofitalan, rekoñese lakon, tanba falla iha avansadu no guarda-rede, tanba ladún iha konsentrasaun ba malu hodi pasa bola ho kuidadu iha lña oin.

Treinadór ekipa FC Sebuki, Fernando Mauno, orgullu ba jogadór sira tanba hatudu jogu kualidade liuhosi servisu hamutuk, mak lori klubu FC Sebuki sai kampiaun iha Kopa ZEESM époka 2022 ne’e.

“Ami manán maibé manán ho sorte de’it, tanba rezultadu duni malu hela, maibé hanesan treinadór agradese ba jogadór sira tanba hatudu jogu furak, unidade no servisu hamutuk iha kampu, ida-ne’e mak save ohin ami ultrapasa ba jogu iha faze finál ne’e” nia orgullu.

Nu’udar treinadór, bainhira partisipa iha eventu ida, la importante atu hada’u prémiu maibé oinsa hatudu jogu furak, nune’e bele sai ezemplu ba foinsa’e sira seluk, katak jogu tenki hatudu profisionál kria amizade iha kampu, nune’e bele kontribui ba prestasaun talentu despportiva

Entretantu, durante jogu hahú hosi primeira no segunda parte ho durasaun menutu 90, lidera hosi árbitru Arlindo Soares, asistente dahuluk Bendito da Conceição, no asistente daruak Rodrigo Teixeira.

Prémiu ba modalidade futeból iha Kopa ZEESM époka 2022

Primeiru lugár hosi FC Sebuki ho valór prémiu $2,000,00 ba segundu lugár okupa hosi FC Amor Oébau ho valór prémiu $1,500.00, no terseiru lugár okupa hosi FC São Rocky Banoko ho valór prémiu $1,000,00, no kuartu lugár okupa hosi FC Fortaleza ho valór prémiu $700,00.

Prémiu ba modalidade Voleiból mane iha Kopa ZEESM époka 2022

Primeiru lugár okupa hosi klubu Espada ho valór prémiu $1,000.00, ba segundu lugár okupa hosi klubu Becune ho valór prémiu $750.00, no terseiru lugár okupa hosi klubu UPM ho valór prémiu $700,00, no kuartu lugár okupa hosi klubu Benson ho valór prémiu $500,00.

Prémiu ba modalidade Voleiból feto iha Kopa ZEESM époka 2022

Primeiru lugár okupa hosi klubu PNTL ho valór prémiu $1000.00, ba segundu lugár okupa hosi klubu Klifat ho valór prémiu $700.00, no terseiru lugár okupa hosi klubu Oémenu ho valór prémiu $500,00, no kuartu lugár okupa hosi klubu Anin Alaban ho valór prémiu $400,00.

Prémiu ba modalidade futeból salaun mane iha Kopa ZEESM époka 2022

Primeiru lugár okupa hosi Gabinete Prezidente Autoridade (GPA) A, ho valór prémiu $1000.00, ba segundu lugár okupa hosi PNTL ho valór prémiu $750.00, no terseiru lugár okupa hosi Diresaun Saúde A, ho valór prémiu $500,00, no kuartu lugár okupa hosi klubu Diresaun Agrikultura ho valór prémiu $400,00.

Prémiu ba modalidade futeból salaun feto iha Kopa ZEESM époka 2022

Primeiru lugár okupa hosi DSAS RAEOA, ho valór prémiu $1000.00, ba segundu lugár okupa hosi GPA B, ho valór prémiu $750.00, no terseiru lugár okupa hosi GPA A, ho valór prémiu $500,00, no kuartu lugár okupa hosi Sekretária Rejonál SAsuntu Finansa, ho valór prémiu $400,00.

Purtantu, eventu Kopa ZEESM époka 2022 ne’e, Autoridade RAEOA aloka rihun $35, ne’ebé hetan apoia mai hosi Sekretaria Estadu Juventude no Desportu (SEJD).

Jornalista: Abílio Elo Nini
Editór: Evaristo Soares Martins