Governu sei aplika vistu livre ba sidadaun Indonézia hakarak tama TL
DILI, 31 agostu 2022 (TATOLI)— Ministra Negosiu Estranjeiru no Kooperasaun (MNEK), Adalzija Albertina Xavier Reis Magno, hateten durante ne’e, Estadu Timor-Leste fó vistu livre ba sidadaun Indonézia ne’ebé hakarak vizita ka tama-mai Timor-Leste.
“Antes ne’e, ita fó vistu livre ba sidadaun Indonézia sira atu tama mai no ita ba sira, maibé tanba kestaun COVID-19, nune’e Governu Indonézia revee fali sira nia lei, nune’e ita (sidadaun Timór) tama ba Indonézia selu visa on arrival $35. Maibé iha tempu besik sira sei iha anúnsiu ruma kona-ba vistu livre,” Ministra Adalzija hateten ba jornalista-sira iha rezidénsia Primeiru-Ministru, Taur Matan Ruak, Faról-Dili, kuarta ne’e.
Governante ne’e dehan fó vistu livre tanba Estadu Timor-Leste adopta sistema demokrátika ne’ebé iha obrigasaun fó liberdade ba ema hotu atu tama ka vizita.
“Iha mundu ne’e, nasaun ne’ebé adopta sistema demokrásia ne’e ema livre tama, ne’ebé ita nia nasaun ne’e ema barak vizita ne’e di’ak liután. Nune’e Ita tenta atu fó vistu livre ba sidadaun sé de’it,” katak Ministra ne’e.
Maibé, Governante ne’e dehan Estadu Timor-Leste fó de’it vistu livre ba nasaun ne’ebé halo ona akordu ne’ebé entre sidadaun nasaun rua vizita ho livre viza.
Entretantu, Nasaun ne’ebé fó vistu livre ba sidadaun Timor-Leste mak hanesan nasaun-sira ne’ebé membru Uniaun Europeia (UE) tanba Governu halo ona akordu.
“Nasaun sira Uniaun Europeia ne’e tanba ita iha akordu sira mai ita nian livre viza, ita ba fali sira nian mós livre viza,” nia afirma.
Jornalista: Hortencio Sanchez
Editór : Florencio Miranda Ximenes
