iklan

HEADLINE, MUNISÍPIU, OÉ-CUSSE (RAEOA), POLÍTIKA

Foin sa’e presiza valoriza loron istóriku sira

Foin sa’e presiza valoriza loron istóriku sira

Padre Parokia Padiae, Carlos de Deus. Imajen Tatoli/Abílio Elo Nini.

OÉ-CUSSE, 31 agostu 2022 (TATOLI) – Padre Parokia Padiae, Carlos de Deus SDV, enkoraja foin sa’e sira hanesan jerasaun foun ba nasaun, atu valoriza loron istóriku sira nu’udar loron determinasaun ba Timor-Leste atu hetan nia independénsia.

Padre Carlos de Deus, informa, selebrasaun konsulta populár iha 30 agostu, nu’udar loron espesiál ba povu Timor Leste tomak, nu’udar mós loron agradesimentu nian ida-ne’ebé timor-oan tomak tenke hasa’e agradese ba Maromak tanba Maromak ninia domin no tulun haraik mai ita nasaun ida ne’ebé hetan independénsia, nasaun ida ne’ebé demokrátiku, nasaun ida ne’ebé livre hosi liman kro’at sira nian.

“Timor-oan ne’ebé la hatene agradese iha loron horsehik, nia la’os timor-oan sá tan nia lahatene loron 30 de agostu, sé nia la hatene loron 30 agostu, nia dalaruma ba hela iha rai seluk karik, nia seidauk moris karik ka ita bele dehan liafuan kritiku traidór sira-ne’ebé mak oho ita-nia saudozu sira, sei bainhira nia la hatene loron ida horseik ne’e,” Padre Carlos, hato’o iha nia omília bainhira dirije misa kari ai-funan ba saudozu Horácio Tabes, iha aldeia Oébaha sub-rejiaun Oésilo, kuarta ne’e.

Tuir soserdote ne’e katak, tanba de’it loron konsulta populár ninia konsikuénsia maka loron ida ohin ne’e mós ema lubuk ida maka mate.

Tanba joven sira ikus-ikus ne’e la respeita autoridade no veteranu sira, lalika tuku lai o nia hirus matan tanba ne’e tenke aprende hosi ema katuas sira.

“Sé kuandu foin sa’e ida la hatene 30 agostu, diakliu husu lai ba ita-nia inan-aman idak-idak atubele esplika loron 30 agostu mai ita, atubele respeita netik ema seluk, ida-ne’e presiza atu hatene, presiza atu valoriza no presiza atu la’o,” nia fó hanoin.

Evajellu maromak nian, hanorin mai ita liu-liu ba eskolante sira atu hadomi malu, nune’e mós ukun na’in-sira presiza hadomi malu, ukun na’in-sira presiza hadomi povu no povu mós buka hadomi ukun na’in sira hanesan Jesus rasik hadomi ita ida-idak.

“Ohin ne’e Jesus dehan, ha’u hadomi imi, ha’u husu ba imi atu hadomi malu, ida-ne’e ita bele aplika iha ita nia moris atu lideransa sira buka atu hadomi malu, lideransa sira buka atu respeita malu, lideransa sira buka atu tuur hamutuk atu bele valoriza rai ida ne’e nia di’ak, atu lori rai ida ne’e ba oin sai nasaun dame iha mundu,” nia afirma.

Tuir nia haree, uluk lideransa sira ida de’it, sira la temi dehan katak o nian, ha’u nian maibé ita hotu nian. Agora sira komesa hatudu liman ida ne’ebá o nian, ida ne’eba ninian, ne’e ita nian susar liafuan sira ne’e kuandu sai.

“Timor- oan sira uluk ne’e berani fó sira ninia moris tomak, sakrifika sira-nia vida, balun mate ema oho balu inimigu sira kaer halo dadur iha komarka tanba sira hadomi rai Timor ida-ne’e, sira hadomi malu tebes, no sira prontu sakrifika sira-nia aan moris atu ajuda malu iha tempu susar nia laran, iha tempu nakukun nia laran,” nia katak.

“Ita moris iha Timor Leste ita ladún fo importánsia ba loron importante sira hanesan loron 30 agostu maibé ita fo fali preoridade ba buat-ne’ebé la’os importante, la’os urjente hanesan komemora loron LGBT, kurrida bisikleta, gas motorizada ba mai, joga bola guling duke fo importánsia ba loron ida hanesan loron ida-ne’e,” nia katak.

Notisia relevante: Taul Tabes mate tanba organiza povu Bobometo vota ba ukun rasik-aan

Jornalista: Abílio Elo Nini
Editór: Evaristo Soares Martins

iklan
iklan

Leave a Reply

iklan
error: Content is protected !!