DILI, 02 setembru 2022 (TATOLI)–Ministériu Edukasaun Juventude no Desportu (MEJD) halo ona selesaun dokumentu profesór voluntáriu 2.799 ne’ebé sira-nia naran públika ona iha munisípiu sira inklui Rejiaun Administrativa Espesiál Oé-cusse Ambeno (RAEOA) atu tama ba prosesu kontratu.
Diretór Jerál Administrasaun no Jestaun Finansa MEJD, Antoninho Pires, relata, prosesu selesaun dokumentu ne’e atu responde ba vaga 2.111 ne’ebé ministériu prepara ona.
“Ita-nia vaga limitadu kompara ho númeru profesór voluntáriu ne’ebé barak liután. Tanba ne’e ita tenke halo fali selesaun dokumentu ne’ebé prienxe duni kritériu maka sei avansa ba prosesu asina kontratu,” Diretór hateten via telefónika, sesta ne’e.
Daudaun Diretór ne’e iha hela munisípiu Bobonaro hodi halo prosesu selesaun dokumentu ba profesór voluntária sira no iha mós Diretór balun mak destaka ba munisípiu sira seluk hodi halo serbisu hanesan tanba tuir alvu molok setembru ramata prosesu hotu tenke konklui ona, tanba ne’e tenke aselera lalais hodi bele relata ba Ministru.
Notísia relevante: Profesór voluntáriu 2.799 sei kompete iha vaga 2.111
Iha fatin ketak, Diretór Nasionál Rekursu Umanu hosi MEJD, Justino Varela, haktuir, prosesu verifikasaun dadus profesór voluntáriu ne’ebé ekipa sira halo iha tinan 2021 ne’e konsege identifika iha profesór voluntáriu hamutuk 5.588, maibé konsege rekolla 2.799 inklui lista adisionál iha 2.789.
Totál dadus profesór rekollandu hamutuk 2.799 ne’ebé públika ona, MEJD husu profesór ida-idak atu submete dokumentu iha kada munisípiu atu ekipa sira bele halo selesaun dokumentu ne’ebé maka konsidera prienxe rekizitu maka sei hetan direitu ba kontratu.
“Ita sei la realiza teste eskrita hanesan baibain halo iha konkursu ruma, maibé ita presiza halo de’it selesaun dokumentu ba profesór voluntáriu 2.799 nian. Bainhira ninia dokumentu prenxe rekizitu mak sei hetan kontratu bazeia ba vaga 2.111 ne’ebé prepara ona,” nia tenik.
Vaga 2.111 ne’ebé MEJD prevee mai hosi dadus profesór sira ne’ebé maka mate, inválidu no rezigna-an hamutuk 1.300 resin, hafoin hatama tan ho vaga anteriór hamutuk 975, ho ida-ne’e maka totál 2.111.
Tuir nia, MEJD tau prioridade atu halo prosesu selesaun ba profesór voluntáriu 2.799, maibé iha ninia kritériu rasik maka hanesan ba profesór voluntáriu iha eskola privadu sira hahú hosi tinan 2003 to’o 2013 no ba eskola públika sira foti hosi tinan 2007-2017.
“Hosi kritériu rua ne’e Ministériu halo totál 894, kompostu hosi eskola privadu 154 no eskola públiku iha 830, ne’ebé sira ne’e maka hetan ona prioridade atu rekruta agora no tuir planu fulan-setembru sei asina kontratu,” Diretór ne’e dehan.
Jornalista : Tomé Amado
Editora : Julia Chatarina
