iklan

DESPORTU, HEADLINE, MUNISÍPIU, OÉ-CUSSE (RAEOA)

Kopa AFO sub-24 sei abertura iha outubru

Kopa AFO sub-24 sei abertura iha outubru

ViSe Prezidente AFO RAEOA, Julio Coel. Imajen Tatoli/Abílio Elo Nini

OÉ-CUSSE, 05 setembru 2022 (TATOLI) – Vise-Prezidente Assosiasaun Futeból Oé-Cusse (AFO), Rejiaun Administrativa Espesiál Oé-Cusse Ambeno (RAEOA), Júlio Coel, informa, daudaun ne’e ekipa ezekutivu iha AFO aprovadu ona kalendáriu ba realizasaun Kopa AFO ba sub-24 sei hala’o iha fulan outubru tinan ne’e.

Vise-Prezidente AFO, Júlio Coel, afirma, objetivu hosi Kopa AFO atu promove talentu foinsa’e sira iha Oé-Cusse ba futuru desportiva iha rejiaun ba Timor-Leste, tanba atividade ne’e nu’udar programa prioridade hosi Federasaun Futeból Timor-Leste (FFTL).

“Programa ne’e tanba iha Asosiasaun Futeból Oé-Cusse iha ezekutivu entaun planu ne’e ita aprova ona, ne’ebé nia kalendáriu atu realiza iha fulan oin, ne’ebé ita sei abertura iha inísiu outubru, ba sub-24, ne’e aprovadu ona ita hein realiza de’it tanba 2021 iha realiza ba sub-22,” Júlio Coel, hatete ba Agência Tatoli iha Oé-Cusse, segunda ne’e.

Parte AFO selesiona fatin sei uza kampu futeból Oébau ne’ebé lokaliza iha suku Costa, sub-rejiaun Pante Makasar, inklui komisaun organzadora no árbitru sira, nomoos atividade ne’e AFO informa ona ba iha responsável klubu sira atu hahú prepara-aan ba treinu.

“Kopa AFO ne’e hanesan taxa rotativa kada tinan, Asosiasaun Futeból organiza turneiu ne’e ba klubu sira-ne’ebé eziste ona iha RAEOA, tuir loloos realiza ona iha setembru ne’e maibé eventu turneiu infantil sub-16 sei la’o hela no sei jogu finál iha 19 setembru ne’e, nune’e iha outubru kontinua ba Kopa AFO,” nia katak.

Nia fundamenta, bainhira Assosiasaun Futeból Oé-Cusse ne’e eziste iha Oé-Cusse dezde 2019, hahú organiza uluk atividade kompetisaun futeból nível sekundáriu, kontinua ba Kopa Referendu ba juventude sira, no iha outubru 2020 realiza fali ba Kopa AFO sub-22, prioridade ba foiensa’e sira atu promove talentu desportiva.

Nia fó-sai katak, fundu ne’ebé durante ne’e AFO iha, hetan subsídiu másimu mai hosi FFTL hahú iha 2019, kada fulan prevee rihun $1, maibé iha abríl, aumenta sa’e ba rihun $1,500, entaun fundu ne’ebé AFO hetan, 30% uza ba administrasaun no 70% uza ba atividade desportu ba kompetisaun.

Nune’e ba rejistrasaun atu partisipa iha Kopa AFO ne’e sei anúnsia iha tempu badak, hodi kontinua kedan enkontru tékniku entre prezidente klubu sira, nune’e bele prepara ba loron abertura nian.

Notísia relevente: Abertura Copa AFO RAEOA sub-22 sei hala’o iha outubru

Jornalista: Abílio Elo Nini
Editór: Evaristo Soares Martins

iklan
iklan

Leave a Reply

iklan
error: Content is protected !!