Autoridade RAEOA prepara tratór unidade 11 fila-rai ba époka 2023
OÉ-CUSSE, 09 setembru 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), liuhosi Sekretáriu Rejionál ba Asuntu Agrikultura, prepara ona tratór hamutuk unidade 11 atu fasilita komunidade hodi fila-rai ba époka 2022-2023.
Diretór Rejionál Agrikultura, Cirilo dos Remedios Baba, informa, preparasaun ba programa fila-rai ba époka 2022-2023, hosi parte Sekretáriu Rejionál Agrikultura, diresaun prepara ona kondisaun tratór hamutuk unidade 11, atubele koloka ba suku sira-ne’ebé kada tinan fasilita fila-rai.
Hanesan iha sub-rejiaun Nítibe, iha suku Bene-Ufe, Suni-Ufe, iha sub-rejiaun Pante Makasar iha suku Taiboko, Costa, Nipani, Cunha, Lalisuk, Naimeko, Lifau, Bobokase, nune’e mós iha sub-rejiaun Oésilo iha suku Bobometo no Usitasa’e.
“Agora ita mós prepara ona karta sirkulár atu hato’o ba autoridade komunitáriu sira, nune’e bele informa ba agrikultór sira, bainhira tratór sira dezloka ba sub-rejiaun sira bele koopera ho estensionista suku no tratorista sira bele halo operasaun,” Cirilo dos Remedios Baba, informa ba Tatoli iha Oé-Cusse, kuarta ne’e.
Nia fó-sai katak, daudaun ne’e diresaun prepara ona mekániku ba tratór sira atu hadi’a kondisaun.
“Ita-nia tratór sei menus iha sarua, entaun ita mós sei haree hosi númeru agrikultór iha suku ne’ebé barak, ita sei koloka tratór rua to’o tolu iha ne’ebá, maibé mekanizmu fila-rai ne’e, Oé-Cusse ein-jeralmente fila-rai ba to’os la’ós gratuita, agrikultór sira mak sei prepara gazoel no gazolina, Estadu prepara tratór ho tratorista,” nia informa.
Nia haktuir, inspesaun jerál estadu, iha Gabinete Primeiru Ministru nia okos, sira mai halo ona inspesaun ba tratór sira iha RAEOA, katak RAEOA sei salva tratór sira maioria kondisaun sei di’ak.
Tanba iha Governu anteriór koloka tratór ba Oé-Cusse hamutuk unidade 21, maibé daudaun ne’e unidade neen aat totál, unidade haat mak aat kmaan, entaun hela unidade 11 mak kondisaun garantidu atu halo operasaun.
“Tan ne’e ita iha RAEOA laiha ona fila-rai gratuita, tanba komunidade tenke partisipa mós iha programa ne’ebé maka Governu fasilita, komunidade presiza kontribui hanesan prepara gazoel no gazolina,” nia katak.
Notísia relevante: MAP RAEOA identifika kondisaun tratór molok halo leilaun
Jornalista: Abílio Elo Nini
Editór: Evaristo Soares Martins
