iklan

EDUKASAUN, HEADLINE, MUNISÍPIU, OÉ-CUSSE (RAEOA)

Edukasaun RAEOA oferese ona kaderneta eskolár ba ensinu báziku to’o terseiru siklu

Edukasaun RAEOA oferese ona kaderneta eskolár ba ensinu báziku to’o terseiru siklu

Diretór Edukasaun RAEOA, Daniel Mauno. Imajen Tatoli/Abilio Elo Nini.

OÉ-CUSSE, 07 setembru 2022 (TATOLI) – Diretór Edukasaun Rejiaun Administrativa Espesiál Oé-Cusse Ambeno (RAEOA), Daniel Mauno, fó-sai katak, daudaun ne’e diresaun edukasaun distribui ona kaderneta eskolár ba ensinu báziku sira hosi primeiru siklu to’o terseiru siklu iha rejiaun ne’e.

Nia informa, distribuisaun kaderneta eskolár hosi Ministériu Edukasaun, Juventude no Desportu (MEJD) mai iha RAEOA, simu ona iha foin lalais, nune’e parte edukasaun rejionál konvida dirijente eskola sira foti ona atu fahe ba estudante sira-ne’ebé seidauk iha.

“Ita simu ona hosi MEJD atu distribui ba ensinu báziku sira, hosi primeiru siklu to’o segundu siklu no terseiru siklu, falta mak ensinu sekundária sira, maibé foin lalais ha’u ba Dili koordena ona ho unidade kurríkulu ezame nasionál, ne’ebé sira prepara ona ba ensinu sekundáriu jerál no tékniku vokasionál sira mai RAEOA,” Daniel Mauno, ko’alia iha Oé-Cusse, kuarta ne’e.

Nia informa, dadus ne’ebé MEJD distribui ba RAEOA hamutuk kaixa hitu, neste mumentu diresaun edukasaun Oé-Cusse, distribui ona ba ensinu báziku sira iha eskola hotu-hotu, atu fahe hosi klase 1⁰ to’o klase 9⁰, ne’ebé fahe ona, maioria eskola sira hetan hotu ona.

Dirijente ne’e la fó-sai númeru estudante detallada kona-bá simu kaderneta eskolár ne’e, maibé parte edukasaun garante kaderneta eskolár ne’ebé distribui ona sei kobre hotu eskola sira, tanba bazea proposta ne’ebé submete ona iha MEJD hodi aloka mai iha Oé-Cusse.

“Ensinu báziku hotu-hotu hetan tiha ona ne’ebé laiha problema ona ho kaderneta, agora profesór sira komesa pasa valór estudante sira nian ba kaderneta foun ne’ebé distribui daudaun, bainhira la to’o karik, parte eskola sei hato’o mai diresaun atu rezolve,” nia katak.

Kaderneta eskolár ne’ebé maka prodús iha tinan ne’e, ninia formatu foun maibé kurríkulu no sistema avaliasaun la muda nafatin hanesan anteriór, tan ne’e, molok distribui ba eskola sira, parte edukasaun fasilita uluk formasaun ba dirijente eskola sira hotu atu iha koñesimentu oinsa bele prienxe.

Tanba kaderneta eskolár ne’e nu’udar instrumentu administrativa ne’ebé sei prienxe dezempeñu estudante sira-nian durante prosesu aprendizajen nia laran bazea ba kurríkulu.

Jornalista: Abílio Elo Nini
Editór: Evaristo Soares Martins

iklan
iklan

Leave a Reply

iklan
error: Content is protected !!