PA RAEOA hatuur fatuk dahuluk ba konstrusaun dormitóriu Ambeno iha Dili
OÉ-CUSSE, 09 setembru 2022 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, kuarta ne’e hatuur fatuk dahuluk ba konstrusaun dormitóriu estudante Ambeno iha munisípiu Dili.
Prezidente Autoridade RAEOA, Arsénio Paixão Bano informa, antes ne’e autoridade muda provizória estudante sira hela iha Don Bosco Comoro, tanba daudaun ne’e empreza atu hahú halo konstrusaun foun ba dormitóriu Ambeno, nune’e autoridade koopera ho estudante sira atu husik hela dormitóriu atu halo konstrusaun foun.
Nia informa, estudante sira-ne’ebé hela iha asrama Ambeno hamutuk na’in-58, feto 17 no mane 41, no konstrusaun ne’e sei ezekuta durante fulan lima, hahú agustu to’o dezembru tinan ne’e.
“Razaun Autoridade halo tanba ita haree kondisaun dormitóriu ladún di’ak ona, kleur ona, entaun prevee osan tenke hadi’a tanba fatin ne’e ba estudante sira hosi Oé-Cusse atu hela hodi hala’o sira-nia estudu iha kapitál, tán ne’e nu’udar autoridade iha obrigasaun atu prepara no halo fatin ba sira,” Arsénio Paixão Bano, informa ba Tatoli liuhosi telefónika.
Nune’e nia enkoraja empreza aselera tuir dokumentu kontratu ne’ebé autoridade propoin ona, atu nune’e estuante sira bele hela ona iha tinan oin, tanba fatin ne’e importante ba estudante sira hosi Oé-Cusse mai hala’o estudu iha kapitál Dili.
“Ita espera empreza ho esforsu tomak, atu serbisu ne’e labele para, kontinua hala’o tuir polítika empreza nian, oinsa bele finaliza lalais tuir kontratu ne’ebé ita tau ona, atu nune’e estudante sira bele mai hela ona,” nia fó hanoin.
Projetu ne’e, Autoridade RAEOA hahú halo anúnsia rezultadu konkursu públiku iha dezembru 2021, ho númeru kontratu, RAEOA-ZEESM TL SRF/UAL/2021-042, nune’e iha agostu tinan ne’e mak foin ezekuta tanba sei haree mós kondisaun no situasaun estudante sira nia hela fatin.
Entretantu, konstrusaun ba dormitóriu Ambeno, ezekuta hosi empreza Bobolait, Unipesoál Lda, ho valór kontratu hamutuk $278,969.71, ne’ebé Autoridade RAEOA aloka hosi Orsamentu Jerál Estadu (OJE) 2021 nian.
Jornalista: Abílio Elo Nini
Editór: Evaristo Soares Martins
