iklan

EKONOMIA, HEADLINE, MUNISÍPIU, OÉ-CUSSE (RAEOA)

MTK sei apoia operasaun ró Success hodi kumpri rekizitu IMO

MTK sei apoia operasaun ró Success hodi kumpri rekizitu IMO

Diretór Jerál MTK, Gaspar de Araújo. Imajen TATOLI/Francisco Sony.

OÉ-CUSSE, 13 setembru 2022 (TATOLI)- Ministériu Transporte no Komunikasaun (MTK) sei apoia empreza Irmão Timor Unipesoál Lda, hanesan na’in ba ró Success nia operasaun hodi kumpri rekizitu sira tuir misaun Organizasaun Internasionál ba Marítima (IMO, sigla inglés).

Diretór Jerál MTK, Gaspar de Araújo, informa, prezensa ró Success, bainhira ró Berlin Nakroma no Berlin Ramelau kuandu iha prosesu manutensaun, MTK sei la preokupa ho konetividade ligasaun Oé-Cusse ba Dili no Atauro tanba operasaun ró ahi Succes iha hela.

Nune’e, Governu sentrál liuhosi Ministériu Transporte no Komunikasaun, sei apoia operasaun nian hodi koopera no kumpri regra sira tuir misaun IMO nian no International Convention for the Safety of Life at Sea (SOLAS).

“Buat balu hakarak hato’o katak, kompañia Irmão Timor mak tenke iha liña koordenasaun di’ak ho diresaun nasionál transporte marítima, iha MTK nia okos hodi operasaun ró ahi ne’e kumpri rekizitu IMO nian, bele garante katak ró ahi ne’e operasaun tuir SOLAS nian, no konvensaun seluk ne’ebé Timor-Leste ratifika ona, tanba Timor-Leste nu’udar nasaun soberanu ida-ne’ebé mak ratifika ho misaun IMO nian, sai mós membru iha dezembru 2004,” Gaspar Aroujo, ko’alia iha nia diskursu iha kampu Palaban, Oé-Cusse, segunda ne’e.

Nune’e nu’udar Estadu soberanu Timor-Leste, iha obrigasaun atu kontribui no kumpri regra internasionál kona-bá transporte marítima sira-nian, tenke kumpre rekizitu ne’ebé hakerek iha konvensaun sira-ne’e.

Nia fundamneta, iha oportunidade ne’e mumentu importante tebes ba Oé-Cusse oan sira tanba kompañia Irmão Timor, nu’udar Oé-Cusse oan, ho korajen halo investimentu boot ida ba konetividade marítima liga Dili ba Atauru no Oé-Cusse.

“Oé-Cusse hanesan enklave ida no Atauru hanesan illa ida, ne’ebé asesu ba iha fatin rua ne’e presiza duni liuhosi viajen marítima, ho nune’e inisiativa ne’ebé hala’o hosi kompañia Irmão Timor, ne’e importante tebes ba iha dezenvolvimentu fatin rua ne’e,” nia orgullu.

“Infelismente prosesu ne’e liuhosi MTK, ita apoia ida-ne’e, tanba sistema transporte ita joint liberaliza, entaun ita fó biban ba setór privadu sira, bele mós hola ró atu koopera halo operasaun mai Oé-Cusse no Atauro, entaun ita la hela ho Governu atu hola ró maibé setór privadu mós bele,” nia katak.

“Ró Success sei koopera iha rai laran no mós sei koopera ho internasionál, ne’ebé ita-nia sistema transporte marítima ne’e, ita tenke kumpre regra internasionál, tanba ita integra iha membru IMO, no konvensaun ita ratifika, entaun ró sira-ne’ebé la’o iha tasi-laran kumpri hotu regra internasionál.”

Diretór jerál ne’e fó-sai katak, iha tinan ida-ne’e nia laran Estadu Timir-Leste sei inaugura no opera portu Tibar, ne’ebé hanaran portu Timor, hanesan infraestrutura boot iha setór marítima, ho nune’e maka bainhira portu ne’e opera, kontentór ne’ebé maka iha portu Dili, sei muda hotu mai portu Tibar.

Tan ne’e ho operasaun portu Tibar, fiar katak dezenvolvimentu setór marítimu, sei sai di’ak liután, tanba kooperativa iha fasilidade operasaun ne’ebé modernu tuir padraun internasionál.

Notísia relevante: https://tatoli.tl/2022/09/13/irmao-timor-husu-komunidade-raeoa-atauro-kuida-ro-success/

Jornalista   : Abílio Elo Nini
Editór         : Evaristo Soares Martins

iklan
iklan

Leave a Reply

iklan
error: Content is protected !!