Autoridade RAEOA lansa programa fila-rai ba époka 2023
OÉ-CUSSE, 16 setembru 2022 (TATOLI) – Autoridade Rejiaun Administrativa Espesiál O’e-Cusse Ambeno (RAEOA) liuhosi Sekretaria Rejionál ba Asuntu Agrikultura, kinta ne’e halo lansamentu ba programa fila-rai to’os komunidade nian ba époka 2023.
“Ita mós lansa ona programa fila-rai ba to’os agrikultór sira ba époka 2023, tanba ita-nia tratór sira hamutuk unidade 12, entaun dezloka ona ba sub-rejiaun haat, nune’e bele hakbesik ba komunidade sira, karik presiza fila-rai, sira bele komunika ho tratorista no estensionista suku,” Sekretáriu Rejionál ba Asuntu Agrikultura, José Eta, informa ba Agência Tatoli, iha Oé-Cusse, sesta ne’e.
Daudaun ne’e autoridade lokál sira hosi suku Bobometo, sub-rejiaun Oésilo submete ona sira-nia pedidu atu fila-rai komunidade nian, no parte diresaun sei kontinua komunika ho jestór no suku sira seluk, atu hatama pedidu, karik presiza tratór atu filarai ba agrikultór sira-nia to’os.
Tanba kada tinan iha sub-rejiaun Nítibe, iha suku Bene-Ufe, Suni-Ufe, iha sub-rejiaun Pante Makasar iha suku Taiboko, Costa, Nípani, Cunha, Lalisuk, Naimeko, Lifau, Bobokase, nune’e mós iha sub-rejiaun Oésilo iha suku Bobometo no Usitasa’e, suku hirak ne’e maka presiza.
“Programa fila-rai ne’e la’ós gratuita, maibé komunidade mak prepara gazolina no gazoel, autoridade RAEOA prepara tratór no tratorista,” nia informa.
Tuir nia, Inspesaun Jerál Estadu, iha Gabinete Primeiru Ministru nia okos, halo ona inspesaun ba tratór sira iha RAEOA, katak ita RAEOA sei salva tratór sira maioria kondisaun sei di’ak.
Tanba iha Governu anteriór koloka tratór ba Oé-Cusse hamutuk unidade 21, maibé daudaun ne’e balun aat no aat kaman, entaun hela unidade 12 mak kondisaun di’ak atu halo operasaun.
“Tan ne’e ita iha RAEOA laiha ona fila-rai gratuita, tanba komunidade tenke partisipa mós iha programa ne’ebé maka Governu fasilita, komunidada presiza kontribui hanesan prepara gazoel no gazolina,” nia katak.
Notísia relevante:MAP RAEOA identifika kondisaun tratór molok halo leilaun
Jornalista : Abílio Elo Nini
Editór : Evaristo Soares Martins
