VIQUEQUR, 23 setembru 2022 (TATOLI)--Polísia Nasionál Timor-Leste (PNTL) hosi departamentu tránzitu nasionál, sesta ne’e, enserra atividade formasaun ne’ebé realiza ona durante semana ida, ba tránzitu munisipál no Ofisiál Polísia Nasionál (OPS) sira hodi hasa’e koñesimentu servisu tránzitu halo kontrolu rodaviáriu iha munisípiu Viqueque.
“Unidade tránzitu hanesan seksaun importante, ne’ebé loron ba loron sira hala’o servisu iha terrenu. Aleinde fó formasaun membru tránzitu no OPS, PNTL hanesan identidade militár, maibé iha karaktér hanesan polísia komunitáriu,” Komadante PNTL munisípiu Viqueque, Supertendente, Sebastião Alves Quintão, hateten hafoin enserra atividade formasaun, iha Kuartel PNTL Viqueque.
Tanba ne’e, obrigatóriu membru PNTL sira tuir formasaun tránzitu hodi bele hatene knaar kada loron iha aldeia no suku ba prevensaun ema-nia vida.
“Ita haree dala barak ema vióla kódigu estrada, maibé polísia sira iha ona koñesimentu kona-ba tránzitu hodi bele halo prevensaun di’ak liután,” nia akresenta.
Notísia relevante: Laiha karta kondusaun, Polísia Tránzitu Dili detein sidadaun na’in-haat
Tuir Superentendente, Sebastião Alves Quintão, durante ne’e membru tránzitu sira ladún iha koñesimentu.
“Ha’u fiar liuhosi formasaun ne’e bele hakle’an koñesimentu ba tránzitu hodi ba oin bele serbisu ho di’ak,” Supertendente tenik.
Formasaun ne’e hahú iha segunda no ramata iha sesta, ne’ebé partisipa hosi membru tránzitu no OPS na’in-25, ho matéria teoria no halo prátika simulasaun asidente tráfegu.
Bazeia ba dekretu-lei númeru 06/2003 kona-ba rejime tránzitu nian, PNTL Viqueque liuhosi Polísia komunitáriu halo sosializasaun ba komunidade hodi kumpre dekretu-lei tránzitu.
“Maski ohin loron ema balun kontinua viola, maibé iha lei ne’e obriga atu kumpre nafatin dekretu-lei no rejimentu tránzitu,” nia fó hanoin.
Biban ne’e, nia husu abitante sira iha munisípiu Viqueque hodi kumpre rejime tránzitu tanba bainhira la kumpre mak sei hetan sansaun.
Servisu unidade tránzitu Viqueque konsege rekolla taxa rodoviária hamutuk $1.676, iha fulan kotuk.
Tuir rekapitulasaun dadus asidente tráfegu, rejista kazu asidente hamutuk 22, kompostu hosi kanek kama’an 18, todan 12 no mate rua, durante janeiru to’o agostu 2022.
Jornalista : Vitorino Lopes da Costa
Editora : Julia Chatarina
