DILI, 05 outubru 2022 (TATOLI)—Prezidente Kooperativa Kafé Timor (CCT-NCBA, sigla portugés), Mário Soares, akompaña hosi Diretór NCBA, Samuel Filicai, hasoru malu ho Primeiru Ministru, Taur Matan Ruak, hodi hato’o apresiasaun ba Governu ne’ebé tinan ne’e konsege reabilita ona planta kafé ektare 8.000.
“Ami hasoru malu ho Primeiru-Ministru atu hato’o apresiasaun ba Governu halo reabilitasaun ba kafé aktare 8.000 tinan ne’e,” Mario Soares hateten hafoin hasoru malu ho Primeiru-Ministru iha Palásiu Governu, kuarta ne’e.
Nia haktuir, durante hasoru ho Primeiru-Ministru, asuntu ne’ebé sira ko’alia maka tau prioridade ba kualidade kafé tanba kafé hanesan kultura Timór nian.
“Ita-nia kompromisu ho Governu mak atu hadi’a kafé, nune’e bá oin kafé sai produtu ne’ebé di’ak iha Timor-Leste hodi hadi’a ita-nia ekonomia iha rai-laran,” nia akresenta.
CCT-NCBA rasik sente apresia ho inisativa Governu halo ona reabilitasaun kafé, nune’e kompromete sei serbisu di’ak liután hodi hasa’e produsaun no kuidadu kualidade kafé iha Timor-Leste hodi bele fa’an iha merkadu nasionál no internasionál.
“CCT rasik ba tinan ne’e sei halo reabilitasaun kafé ektare 600 no daudaun ne’e hahú ona iha semana kotuk,” nia hateten.
Biban ne’e, Xefe Governu fó mensajen ba CCT-NCBA atu kuidadu kafé nia kualidade nune’e bele fa’an iha merkadu.
Jornalista : Arminda Fonseca
Editora : Julia Chatarina
