RAEOA aumenta fasilidade hodi haforsa servisu Obra Públika
OÉ-CUSSE, 07 outubru 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), lideradu Arsénio Paixão Bano, kinta ne’e realiza serimónia asina termu entrega ekipamentu hanesan topografia no laboratóriu ho empreza Oemeltimo Unipessoal Lda, atu haforsa servisu Obra Públika iha rejiaun ne’e.
“Autoridade halo ona serimónia ida, ita asina termu entrega ekipamentu sira hanesan topografia no laboratóriu, ita aumenta fasilidade ira-ne’e atu mellora tán servisu sira iha Diresaun Rejionál Infraestrutura nian,” Prezidente Autoridade RAEOA, Arsénio Paixão ko’alia iha Oé-Cusse, sesta ne’e.
Nu’udar Prezidente Autoridade iha responsabilidade tomak iha Oé-Cusse, kontinua apela ba tékniku sira iha Obra Públika, atu uza ekipamentu sira-ne’e ho kuidadu no responsabilidade tanba fasilidade ne’e uza osan Estadu maka sosa no iha futuru iha sei hadi’a servisu sira iha diresaun ne’e.
“Ha’u hanoin iha futuru ita bele halo EDTL, SAS, APORTIL no Transporte Terrestre tenke sai Empreza Públika, tanba foin daudaun Governu liuhosi Konsellu Ministru aprova ona Estatutu Organigrama RAEOA nian, entaun ita bele halo ida-ne’e” nia afirma.
Diretór Rejionál Infraestrutura, Candido dos Reis Amaral, hatete, ekipamentu topografia no labarotóriu atu fasilita de’it servisu konstrusaun sivíl, tanba iha servisu espesializada ne’ebé bolu naran servisu topografia.
“Tán ne’e ho divizaun ida-ne’e importante tebes atu garante kuantidade no kualidade servisu, inklui estatístika servisu, no mós divizaun ne’e mós importante atu ajuda haree ba planu servisu sira iha futuru hanesan estrada, uma, ponte,” nia katak.
Diretór Obra Públika ne’e fó-sai katak, ekipamentu ne’ebé simu, maka hanesan totál estasaun ho kedas asesor sira TS 07 1R500 kompleta ho asesor, GS 16 RUHFLIMITED Base ho nia asesor, GS 16 R UHF limeted rover ho asesores, Garmin, 78s 2 unidade, sofware autokad incluiding specialized toolsed 2023.
Entretantu, fornesedór ba ekipamentu hirak-ne’e hosi empreza Oemeltimo Unipessoal Lda ho valór hamutuk $64. 518.00, fundu ne’e Autoridade RAEOA aloka mai hosi Orsamentu Jerál Estadu (OJE) 2022 RAEOA nian.
Jornalista : Abílio Elo Nini
Editór : Evaristo Soares Martins
