Komunidade Kutete asesu ona infraestrutura bázika
OÉ-CUSSE, 19 outubru 2022 (TATOLI) – Xefe aldeia Mahata, suku Costa, sub-rejiaun Pante Makasar, Carlos Boas, orgullu no agradese ba Autoridade Rejiaun Administrativa Espesiál Oé-Cusse Ambeno (RAEOA), tanba fasilita ona komunidade iha bairru izoladu Kutete asesu ona infraestrutura bázika hanesan, estrada, bee-moos no elétrika.
“Ha’u hanesan xefe aldeia Mahata, orgullu boot tanba dezenvolvimentu ne’e halo luan to’o ami-nia bairru izoladu Kutete. Ida-ne’e ami hakarak agradese ba Autoridade RAEOA tanba agora daudaun ne’e ami asesu ona eletrisdade, bee-moos no estrada, ita haree estrada liga ba ami-nia bairru Kutete dezde tempu portugés tama to’o Indonézia nia ukun, no faze ukun-an laiha, agora 2022 ne’e mak estadu rekoñese ami-nia terus, liga estrada mai kutete, dada ahi no halo kanalizasaun bee-moos,” Carlos Boas informa ba Agência Tatoli iha Oé-Cusse, kuarta ne’e.
Tuir autoridade lokál ne’e katak, iha tempu udan transporte labele ultrapasa tanba rai tahu xubida maka’as, maske nune’e mós iha tempu bailoron bele liu maibé kondisaun estrada ladi’ak tanba nakonu ho fatuk no kuak.
“Maibé iha tinan ne’e Autoridade RAEOA hahú mellora, tau ponte no bee-dalan agora ita haree di’ak ona, komunidade bele liu ho transporte, tán ne’e ha’u hanesan xefe aldeia Kutete, informa katak, estrada ne’e benefisia direita komunidade 1.899, mane 908 no feto 991, mak hela iha foho Kutete,” nia katak.
Notísia relevante: Reabilitasaun estrada rurál ho kilómteru 14 benefísia komunidade Bobokase-Costa
Jornalista : Abílio Elo Nini
Editór : Evaristo Soares Martins
