BOBONARO, 26 outubru 2022 (TATOLI) – Polísia Nasionál Timor-Leste, komandu munisípiu Bobonaro, liuhosi seksaun tránzitu serbisu hamutuk ho forsa rezerva polísia, tersa ne’e hala’o pasa-revista ba veíkulu sira movimenta liu iha área kruzamentu tolu bairru Obor, suku Raifun no Rotunda kapitál Maliana, munisípiu Bobonaro.
Iha atividade pasa revista hahú hosi tuku 08:00 to’o tuku 10:00 ne’e ekipa tránzitu konsege halo apreensaun ba motorizada hamutuk 48 tanba viola regra tránzitu ne’ebé fó-sai ona.
Xefe seksaun tránzitu munisípiu Bobonaro, Sarjentu Xefe, João Belo, informa pasa-revista ne’e hanesan planu operasaun komandu munisípiu Bobonaro nian bazea ba lei númeru 6/2003 ne’ebé maka fó autorizasaun ba polísia tránzitu atu halo apreensaun ba veíkulu ne’ebé mak komete infrasaun bainhira movimenta iha luron públiku.
Notísia relevante: Tránzitu Bobonaru sei halo auto-stop ba viatura Estadu iha loron finadu
“Ita konsege prende (halo apreensaun) ba motorizada 48 ne’ebé maka halo infrasaun hensan laiha karta kondusaun, espellu laiha, xapa-matríkula oin-kotuk laiha, balu mós ninia dokumentu mate,” nia informa ba jornalista sira, iha kna’ar fatin, Maliana, tersa ne’e.
Purtantu infratór sira idak-idak hetan ona kartaun kinur sei ba selu koima direita iha Banku Nasionál Komérsiu Timor Leste (BNCTL, sigla Portugues) sukursál Maliana ho valór orsamentu depende ba kategoria infrasaun ne’ebé komete, hafoin bele foti motorizada.
Sarjentu Xefe João Belo, agradese ba infratór sira-ne’ebé iha sentidu hakarak koopera ho autoridade seguransa, tanba tuir nia hanesan sidadaun ne’ebé di’ak tenke iha devér no obrigasaun atu kumpre regra ne’ebé mak ezsiste ona.
“Tuir planu operasaun ne’ebé ita halo, ita la termina tempu, iha kualkér tempu atu kalan ka loron ita halo atuasaun másimu liuhosi operasaun pasa-revista, atubele minimiza sidadaun sira utiliza veíkulu karik tuir lei kódigu estrada,” nia fó hanoin.
Enkuantu iha atvidade pasa-revista ne’e polísia la’ós haree de’it ba motorizada no veíkulu ne’ebé komete infrasaun, maibé haree mós arma branka no sasán kontra bandu sira-ne’ebé tama hosi Atambua, Belu, provínsia Nusa Tenggara Timur (NTT), Indonézia.
Planu operasaun ne’ebé hetan provasaun hosi Komandante Komando Polísia munisípiu Bobonaro, Superitendente Antóninho Maluta, orienta ekipa tránzitu halo pasa-revista ba viatura estadu sira-ne’ebé movimenta la uza Guia de Marça iha fim de semana, liuliu iha loron finadu, hahú hosi 02 novembru to’o remata.
Notísia relevante: PNTL Bobonaro halo tán apreensaun ba motorizada 21 iha Nunura
Jornalista : Sérgio da Cruz
Editór : Evaristo Soares Martins
