DILI, 27 outubru 2022 (TATOLI)—Sekretária Estadu Igualdade no Inkluzaun (SEII), Maria do Rosário Fatima Correia, relata iha trimestre datoluk (jullu-setembru) ne’e SEII ezekuta ona verba Orsamentu Jerál Estadu (OJE) 2022 atinje ona 68%.
Notíia Relevante: PN aprova OJE 2022 ba SEII iha espesialidade
“Agora daudaun ezekusaun orsamentu SEII nian ba trimestre datoluk ne’e ami atinje ona 68%, ne’ebé ekivalénsia ho osan hamutuk $387,518.20,” Maria do Rosário Fatima Correia hateten liuhosi Konferénsia Imprensa ne’ebé hala’o iha Salaun Enkontru Maria Gorreti, Caicoli, Dili, kuarta ne’e.
Diretór Jerál Sekretária Estadu Igualdade no Inkluzaun (SEII), Armando da Costa, hateten ezekusaun 68% durante ne’e SEII uza ba kategoria haat (4) kompostu hosi saláriu no vensimentu, bens servisu, tranferensia públika no kapitál menór.
“Iha saláriu no vensimentu ne’e uza ba selu saláriu funsionáriu permanente ho ajente sira, bens servisu uza ba finansia ami-nia programa hotu, hanesan programa abordajen integradu jéneru, programa prevensaun violénsia bazea ba jeneru, programa feto iha polítika no programa empoderamentu ekonomia,” nia esplika.
Ba transferénsia públika iha tinan ne’e, SEII aloka rihun $300 ne’ebé ezekuta ona 100%. nune’e ba kapitál menór ne’e ezekuta ona 98%.
“Tanba, kapitál menór iha tinan ida-ne’e ami uza ba sosa ami-nia ekipamentu servisu hanesan komputadór, laptop no printer. Tanba ne’e, ami fiar to’o fim do ano ka to’o dezembru ne’e, ami bele atinje pelumenus liuhosi 80%,” nia dehan.
Notísia Relevante: SEII ezekuta OJE 2022 atinje 50% iha trimestre daruak
Jornalista : Nelia Fernandes
Editór : Cancio Ximenes
