𝟮𝟬𝟭𝟴-𝟮𝟬𝟮𝟭, 𝗚𝗼𝘃𝗲𝗿𝗻𝘂 f𝗼𝘁𝗶 𝗯𝗶𝗹𝗶𝗮𝘂𝗻 $𝟯,𝟵 𝗵o𝘀𝗶 𝗙𝘂𝗻𝗱𝘂 𝗠𝗶𝗻𝗮𝗿𝗮𝗶
DILI, 29 outubru 2022 (TATOLI) – Hahú hosi tinan 2018 to’o tinan 2021, VIII Governu Konstitusionál halo levantamentu osan hosi Fundu Minarai hamutuk biliaun $3,9 ka 88% husi montante billiaun $4,5 ne’ebé mak aprovadu husi Parlamentu Nasionál. Ida-ne’e hatudu katak iha diferensa kuaze millaun $534,7 entre montante ne’ebé mak Parlamentu Nasionál autoriza no levantamentu atuál ne’ebé mak Governu halo.
To’o iha trimestre datoluk 2022, Governu liuhosi Ministériu Finansa foin mak halo levantamentu osan husi Fundu Minarai ho montante totál millaun $854 ka 33% husi totál biliaun $2,55 ne’ebé mak Parlamentu Nasionál autoriza liuhosi Lei OJE Retifikativu 2022.
“Medida ne’ebé mak daudaun ne’e ita aplika iha Ministériu Finansa mak fluxu kaixa, signifika bainhira iha ona nesesidade atu halo reforsu ba kaixa Estadu maka Ministériu Finansa sei hato’o tán pedidu levantamentu adisionál ba Banku Sentrál,” Ministru Rui Gomes liuhosi komunikadu ne’ebé Agência TATOLI asesu sabádu ne’e.
Bazea ba relatóriu husi Banku Sentrál Timor-Leste ne’ebé públika iha 8 agostu, to’o iha fulan-juñu 2022, balansu Fundu hamutuk biliaun $17,8.
Rekorda iha fulan-Jullu 2021, Oitavu Governu Konstitusionál lideradu Primeiru-Ministru, Jenerál Taur Matan Ruak introdús polítika segmentasaun ka investimentu fundu minarai ba iha karteira rua: karteira Likidez no karteira kresimentu.
Karteira Likidez uza hodi finansia Orsamentu Estadu ba tinan tolu oin mai no investe iha Ativos risku ki’ik. Enkuantu restante do fundu investe iha karteira kresimentu ba longu prazu.
Polítika segmentasaun ka investimentu fundu minarai ne’e Governu introdús atu: elimina risku fundu hosi dekumulasaun; liga estratéjia investimentu ho polítika fiskál; permite objetivu investimentu ida-ne’ebé klaru ba kada karteira; no fó konfiansa ba Governu katak levantamentu kurtu prazu protejidu husi volatilidade.
Jornalista: Hortencio Sanchez
Editór: Evaristo Soares Martins
