DILI, 18 novembru 2022 (TATOLI)—Governu Timor-Leste, iha kinta (17/11), realiza serimónia despedida ho traballadór timor-oan 100, liuhosi asina deklarasaun konkordánsia entre Sekretaria Estadu Formasaun Profisionál no Empregu (SEFOPE), família no traballadór ne’ebé sei arranka bá serbisu iha Koreia Súl.
Serimónia ne’e partisipa hosi Ministru Koordenadór Asuntu Ekonomiku (MKAE), Joaquim Amaral, hamutuk ho Sekretáriu Estadu Formasaun Profisionál no Empregu (SEFOPE), Alarico do Rosário, inklui reprezentante Embaixadór Koreia Súl iha Timor-Leste, Jooyun Yang, no Diretór Diresaun Nasionál Empregu Exteriór, Filomeno Soares.
Biban ne’e, Ministru Koordenadór Asuntu Ekonómiku, Joaquim Amaral, apela ba traballadór sira ne’ebé sei bá serbisu iha área peska, hodi hatudu komportamentu serbisu di’ak, respeita ema-nia lei, kultura no labele halai ses hosi sistema, nune’e bele hetan nafatin konfiansa hosi empregadór sira.
“Polítika Governu liuhosi Sekretaria Estadu Formasaun Profisionál no Empregu hodi haruka joven timor-oan bá serbisu iha ema-nia rain la’ós de’it atu buka osan, maibé buka apreende tan esperiénsia foun hosi ema-nia ra’in, nune’e fila mai dezenvolve ita-nia nasaun Timor-Leste sai hanesan país sira seluk ne’ebé dezenvolvidu iha mundu,” Ministru Koordenadór hateten liuhosi nota ne’ebé Agência Tatoli asesu, sesta ne’e.
Notísia relevante: Traballadór timor-oan serbisu iha Koreia no Austrália kontribui reseita millaun $78
Governante ne’e agradese ba Governu Koreia Súl ne’ebé nafatin iha komprimisu hodi rekruta joven timor-oan hodi hetan empregu iha Koreia Súl hodi bele hadi’a ekonomia família no nasaun, inklui hato’o mós parabéns ba esforsu ne’ebé SEFOPE liuhosi Diresaun Nasionál Empregu Exteriór halo hodi tinan ne’e haruka traballadór bá serbisu iha Koreia Súl ho númeru boot.
Biban hanesan, Diretór Diresaun Nasionál Empregu Exteriór, Filomeno Soares, hateten, serimónia asina deklarasaun ne’e hanesan konkordánsia ne’ebé família traballadór halo, katak aseita kaben ka oan atu ba serbisu, la’ós Governu maka obriga, nune’e bainhira mosu problema ruma, parte rua iha responsabilidade hodi rezolve.
“Tanba ne’e, asina deklarasaun konkordánsia ne’e importante,” nia afirma.
Jornalista : Antónia Gusmão
Editora : Julia Chatarina
