Ema 50 hosi RAEOA tuir formasaun iha área turizmu kona-bá atendimentu vizitante
OÉ-CUSSE, 30 novembru 2022 (TATOLI) – Ema na’in-50 iha Rejiaun Administrativa Espesiál Oé-Cusse Ambeno (RAEOA), partisipa formasaun hodi hasa’e koñesimentu iha área turizmu komunitária kona-bá oinsá fó atendimentu di’ak ba bainaka sira bainhira hala’o vizita iha rejiaun ne’e.
Atividade formasaun ne’e realiza durante loron tolu, hahú kuarta to’o sesta semana ne’e, ne’ebé organiza hosi Unidade Turizmu Komunitáriu ne’ebé tutela iha Gabinete Prezidente Autoridade RAEOA, no fasilita formasaun ne’e mai hosi Sentru Formasaun Vokasionál Juventude Komoro, tanba hetan ona legalidade liuhosi sertifikadu nasionál no internasionál, kona-bá service.
Formasaun ne’e abertura hosi Sekretária Rejionál ba Asuntu Edukasaun no Solidariedade Sosiál, Avelina da Costa, konsidera importante tebes atu hasa’e no hadi’a di’ak liután no atitude kona-bá atendimentu vizitante sira bainhira hala’o vizita iha Oé-Cusse.
Koordenadór Unidade Turizmu Komunitáriu, Nene de Almeida, informa, formandu na’in-50 ne’e maioria mai hosi otel, restaurante, guest-house, ambulante transporte sira, liuliu tum-tum, hodi hasa’e kapasitasaun oinsá atende kliente ba vizitante bainhira hala’o vizita iha Oé-Cusse.
“Objetivu hosi treinamentu (Formasaun) ne’e oinsá atu hasa’e koñesimentu no kapasitasaun ba ita, atu oinsá bele hadi’a ita-nia atendimentu ba ita-nia bainaka sira hosi fatin seluk ka hosi Oé-Cusse rasik hakarak mai vizita Oé-Cusse, entaun ita-nia ema sira presiza iha atendimentu di’ak ho organizadu, nune’e bele fó satizfasaun ba vizitante sira, tanba ida-ne’e lori Oé-Cusse nia laran la’os ema ida-rua nian, sé atendimentu di’ak Oé-Cusse nia naran mós sai di’ak,” Nene de Almeida, hatete iha salaun edukasuan Oé-Cusse, kuarta ne’e.
Jornalista: Abílio Elo Nini
Editór: Evaristo Soares Martins
