DILI, 21 dezembru 2022 (TATOLI)—Eletricidade de Timor-Leste, Empreza Públika (EDTL, E.P), iha tersa (20/12), ofisialmente inaugura liña eletrisidade ba komunidade iha aldeia Soikili , suku Parlamentu, postu administrativu Moru, munisípiu Lautém, liuhosi Projetu Eletrifikasaun Nasionál (PEN) pakote 44.
Xefe suku Parlamentu, Angelo Galvão, apresia no orgullu ba esfosu VIII Governu liuhosi EDTL, E.P ne’ebé implementa PEN no ikus mai komunidade aldeia Soikili bele asesu ahi nia naroman.
“Durante okupasaun portugés to’o ukun rasik-an, komunidade la asesu enerjia elétrika, maibé ohin loron ami hetan ona naroman eletrisidade nian. Ida-ne’e ami sente kontente no orgullu,” Angelo Galvão, hateten liuhosi nota ne’ebé Agência Tatoli asesu, kuarta ne’e.
Notisia relevante: Aldeia Soikili tinan barak seidauk asesu eletrisidade
aldeia-soikili-tinan-barak-seidauk-asesu-eletrisidade.
Prezidente EDTL, E.P, Paulo da Silva, husu ba komunidade Soikili atu uza eletrisidade ho didi’ak, kuidadu no uza enerjia banhira presiza, nune’e bele poupa eletrisidade.
“Ha’u husu imi labele halo intervensaun direita, tanba bainhira akontese maka sei fó risku ba ita-nia nia vida rasik,” nia akresenta.
EDTL, E.P sei fó oportunidade ba komunidade aldeia Soikili atu uza eletrisidade gratuita to’o fulan-neen, hafoin tékniku sira sei ba halo sosialiazasaun no monta kontadór ho objetivu atu ajuda regulariza eletrisidade ne’ebé uza, atu ahi lakan nafatin maibé ho kontribuisaun entidade hotu.
Liña eletrisidade ne’ebé liga ba komunidade Soikili , toma konta hosi empreza, Black Bird Unip.Lda, hosi Moru ba Soikili , ne’ebé kobre to’o distánsia kilómetru hitu, ho totál orsamentu $383.000.
Aldeia Soikili ho totál populasaun 717 hosi uma-kain 150, enkuantu suku Parlamentu rasik kompostu hosi aldeia lima hanesan Iparira, Ira’ara, Moro, Soikili , ho totál populasaun 3.256 hosi uma-kain 721.
Jornalista : Arminda Fonseca
Editora : Julia Chatarina
