BAUCAU, 16 janeiru 2023 (TATOLI) – Administrasaun postu administrativu Baguia seidauk finaliza implementasaun Programa Mão de Obra Postu Administrativu (POMPA) faze daruak.
Administradór postu administrativu Baguia, António dos Ramos, tarde tanba transferénsia orsamentu faze daruak nian.
“Faze daruak foin pursentu 50 no sei kontinua no sei finaliza iha fulan-janeiru ne’e,” Administradór postu administrativu Baguia hateten iha Vila Nova, segunda ne’e.
Maske nune’e, faze dahuluk finaliza ona iha fulan-novembru no implementasaun atividade hanesan reparasaun estrada iha suku sanulu.
Postu Baguia aloka orsamentu ba kada suku hamutuk rihun $10 ne’ebé envolve kada suku hamutuk traballadór na’in-20 hosi total traballadór na’in-200.
“Ami deside implementa de’it atividade reparasaun estrada ba kada suku,” António Ramos akresenta.
Postu administrativu Baguia hetan alokasaun orsamentu hodi implementa programa PMOPA tinan 2022 hamutuk rihun $130-resin komposta hosi suku sanulu hanesan Afaloicai, Alaua karaik, Alaua leten, Defawasi, Haeconi, Larisula, Lawateri, Osso-Huna, Samalari no Uacala.
Jornalista : Natalino Belo
Editór : Evaristo Soares Martins
