DILI, 16 janeiru 2023 (TATOLI)— Governu Timor-Leste liuhosi Sekretária Estadu Formasaun Profisionál no Empregu (SEFOPE), domingu (15/01) ne’e haruka tan traballdór timor-oan na’in 50 ba servisu iha Korea Súl iha área peska nian.
Diretór Diresaun Nasionál Empregu Exteriór (DNEE) Filomeno Soares husu ba traballadór sira atu servisu tuir regra ne’ebé iha no labele halai ses hosi sistema, no kontinua hatudu komportamentu servisu ne’ebé di’ak nune’e empregadór sira bele konitinua fo nafatin oportunidade ba joven Timor-oan sira atu ba servisu iha Korea Súl.
“Ha’u husu ba ita-boot sira bá servisu kuidadu an. Hatudu nafatin komportamentu ne’ebé di’ak, aprende esperénsia barak atu fila fali mai dezenvolve ita-nia rai. Imi tenke agradese ba oportunidade ida ne’e tanba iha tinan foun ne’e ita-boot sira bele ba servisu iha Korea Súl,” Filomeno Soares, hateten liuhosi nota komunikadu ne’ebé Agência TATOLI asesu, segunda ne’e.
Joven Timor-oan na’in 50 ne’e rasik, sai hosi Timor-Leste iha loron domingu (15/01) oras 07:30 dader hó aviaun Drukair, ne’ebé sei tranzit iha Singapura. No iha loron 16 janeiru 2022 ekipa sei to iha iha Aeroportu Incheon Korea Súl.
Jornalista : Arminda Fonseca
Editora : Armandina Moniz
