DILI, 31 janeiru 2023 (TATOLI) – Eis Primeiru-Ministru, Mari Alkatiri husu ba Governu atu buka alternativa hodi rezolve problema uma kain-hitu iha Aldeia Becuse-kraik, Suku Becora, Postu Administrativu Cristo Rei, ne’ebé sofre hosi desizaun Tribunál atu hasai sira husi fatin ne’eba.
“Ha’u fó apelu ba Governu atu atua lalais, husi Ministériu Justisa ho terras propriedade, husi Ministériu Administrasaun Estatál atu bele koloka populasaun sira ne’e iha fatin ida seguru, (integra no bele mós benefísiu sira ba Uma naroman ba povu”, Atuál Sekretáriu Jerál FRETILIN, Mari Alkatiri dehan iha kna’ar fatin Farol.
Tuir nia, molok Tribunál foti desizaun ne’ebé atu afeta ba família hitu, Tribunál ho Governu loloos halo kooperasaun ho terras propriedade, buka fatin alternativa temporária ka permanente hodi rezolve problema ne’e tuir polítika Governu, Uma naroman ba povu.
“Ha’u hatete tiha ona, órgaun soberanu sira atu foti desizaun, tenke haree nia konsenkuénsia no nia impaktu ba populasaun. La’ós labele foti desizaun maibé kada órgaun soberania iha nia kompeténsia rasik, Tribunál foti desizaun tuir lei no konstituisaun, mais Governu iha nia programa atu labele husik povu atu terus, entaun tenke iha kooperasaun entre Tribunál no Governu atu desizaun ida hanesan foin daudauk halo iha Becuse ne’e fó konsenkuénsia la di’ak ba família hitu, entaun Governu tenke buka kondisaun atu haree ema sira ne’e tau matan ba sira, ida ne’e mak ita-nia polítika lori naroman ba povu”, nia dehan.
Eis Primeiru-Ministru afirma ida ne’emak dalan atu rezolve problema, labele iha sidadaun ida-idak hanoin katak nia bele iha poder liu fali Tribunál, liu fali Governu ka liu fali orgaun soberania sira seluk. Timor-Leste nu’udar Estadu direitu demokrátiku iha artigu 2 Konstituisaun RDTL klaru, soberania nia abut mak povu maibé atu ezerse soberania ida ne’e, iha orgaun soberania haat, ida mak Prezidente da Republika, Governu, Parlamentu Nasionál no tribunál.
Sidadaun ne’ebé de’it bele la konkorda ho desizaun saída de’it mak órgaun soberania ida foti, maibé tenke tuir prosesu legál ne’ebé vigora iha RDTL.
Notísia relevante :http://Uma kain-hitu iha Bekuse hetan eviksaun, Xanana Solidariza
Jornalista : Natalino da Costa
Editór : Zezito Silva
